Бокс бўйича ЖЧ—2023. Ойбек Жўраев ва Асадхўжа Мўйдинхўжаев финалга йўл олди, Аълохон Абдуллаев эса бронза медали соҳибига айланди

Тошкент мезбонлигида ўтаётган бокс бўйича Жаҳон чемпионатининг ярим финалидан ўрин олган жанглар 12 май, жума куни бўлиб ўтмоқда. 

-54 кг вазн тоифасида Ойбек Жўраев россиялик Дмитрий Двалига қарши жанг қилиб, 5:0 ҳисобида ғалаба қозонди ва финалга йўл олди.

Жўраев ярим финалга қадар сербиялик Тамир Галанов, албаниялик Ариол Зенели ва испаниялик Габриэль Эскобарни мағлуб этганди. 

-67 кг вазнда Асадхўжа Мўйдинхўжаев Мишеелт Баттумурга (Мўғулистон) ҳеч қандай имкон қолдирмади ва финал босқичига йўлланмани қўлга киритди. 

Асадхўжа турнир давомида япониялик Юто Вакита, беларуслик Кирил Самадурау ва кубалик Рониэл Иглесиасга қарши жанг қилиб, ғалаба қозонганди. 

-75 кг вазн тоифасида Аълохон Абдуллаев эса Бразилия вакили Вандерлей Перейрага қарши рингга кўтарилди. Уч раунд натижасига кўра, Аълохон рақибига 1:4 ҳисобида имкониятни бой бериб қўйди. 

Абдуллаев ушбу босқичга қадар Менгянг Жао (Хитой), Алмир Мемич (Сербия) ва Филип Акилов (Венгрия) устидан зафар қучганди. 

Бугун рингга кўтариладиган боксчиларнинг рақиблари ва жангларнинг бошланиш вақти билан танишинг:

• -92 кг Лазизбек Муллажонов – Муслим Гажимагомедов (Россия), (17:00 дан сўнг);
• -51 кг: Ҳасанбой Дўстматов – Мартин Молина (Испания), (18:15 дан сўнг);
• -57 кг: Абдумалик Ҳалоков – Мунарбек Сеитбек Уулу (Қирғизистон), (18:45 дан сўнг);
• -63,5 кг: Руслан Абдуллаев – Хованец Бачков (Арманистон) (19:00 дан сўнг);
• -71 кг: Саиджамшид Жаъфаров – Вандерсон Де Оливейра (Бразилия), (19:45 дан сўнг);