Эрлинг Ҳоланд журналистлар талқинига кўра АПЛда йилнинг энг яхши ўйинчиси деб топилди

“Манчестер Сити” ҳужумчиси Эрлинг Ҳоланд Англия футбол журналистлари ассоциацияси талқинига кўра йилнинг яхши ўйинчиси деб топилди.

Норвегиялик форвардга иштирокчиларнинг 82 фоизи овоз берган ва Ҳоланд таъқибчиларини рекорд даражадаги фарқ билан ортда қолдириб, биринчи ўринни олган. Қайд этиш керак, ташкилот сайтида аввалига футболчи 72% овоз билан ғалаба қозонгани эълон қилинганди, кейинроқ рақамлар тўғриланган.

Иккинчи ўринни “Арсенал” вингери Букайо Сака эгаллаган, учинчи ўринда “канонирлар” ярим ҳимоячи Мартин Эдегор қайд этилган. Шунингдек, Кевин де Брюйне (“Манчестер Сити”) ва Маркус Рэшфорд (“Манчестер Юнайтед”) кучли бешликдан ўрин олган.

Ҳоланд Англиядаги илк мавсумини ўтказмоқда. Футболчи жорий мавсум барча мусобақалар доирасида 47 та ўйин ўтказиб, 51 гол ва 8 та голли узатма муаллифига айланди.

Аввалроқ Ҳоланд Англия чемпионати бир мавсумида урилган голлар сони (35) бўйича рекорд қайд этганди.