Boks bo‘yicha JCH—2023. Abdumalik Halokov muddatidan avval g‘alaba qozondi, Ruslan Abdullayev va Saidjamshid Ja’farov esa raqiblarini yengib, finalga yo‘l oldi

Toshkent mezbonligida o‘tayotgan boks bo‘yicha Jahon chempionatining yarim finalidan o‘rin olgan janglar 12-may, juma kuni bo‘lib o‘tmoqda. 

-57 kg vazn toifasida Abdumalik Halokov qirg‘izistonlik Munarbek Seitbek Uuluga qarshi ringga chiqib, birinchi raunddayoq texnik nokaut evaziga g‘alaba qozondi. 

Halokov avvalgi bosqichlarda gayanalik Kevin Alikok, avstraliyalik Charli Senior va iordaniyalik Ishish Yusufni yenggandi.

-63,5 kg vazn toifasida Ruslan Abdullayev Xovanets Bachkovga (Armaniston) qarshi jang qildi va 5:0 hisobida g‘alaba qozondi. 

Abdullayev bunga qadar ispaniyalik Oyer Ibarreche, Puerto-Riko vakili Manuel Febus, mavrikiylik Richanro Kolin va fransiyalik Lounes Xamraouini mag‘lubiyatga uchratgandi. 

-71 kg vaznda Saidjamshid Ja’farov braziliyalik Vanderson De Oliveyrani 4:1 hisobida mag‘lub etdi va finalga chiqdi. 

Saidjamshid avvalgi bosqichlarda mozambiklik Osorio Muxanga, meksikalik Marko Verdeni yenggan, nimchorak finalda Puero-Riko vakili Gabriel Llanosga qarshi jangi esa raqibning jarohati sabab o‘tkazilmagandi. Chorak finalda Ja’farov Rossiya vakili Igor Sviridchenkovdan ustun kelgandi. 

Shu tariqa yetti nafar o‘zbekistonlik bokschi finalda oltin medal uchun jang qiladi. A’loxon Abdullayev (-75) va Lazizbek Mullajonov (-92 kg) esa bronza medalini qo‘lga kiritdi.