Тошкент мезбонлигида ўтаётган бокс бўйича Жаҳон чемпионатининг ярим финалидан ўрин олган жанглар 12 май, жума куни бўлиб ўтмоқда.
-51 кг вазн тоифасида Ҳасанбой Дўстматов испаниялик Мартин Молинага қарши жанг қилди. Биринчи раундда барча ҳакамлар Ҳасанбойнинг устунлигини қайд этди. Иккинчи раундда ҳам Дўстматов рақибига имкон қолдирмади. Учинчи раундни ҳам ўз фойдасига ҳал қилган ўзбекистонлик боксчи финалга йўл олди.
Ҳасанбой ушбу босқичга қадар марокашлик Саид Мортажи, Мексика вакили Альберто Хименес, кубалик Эрислан Ромеро ва япониялик Томоя Субоини мағлуб этганди.
Ярим финал баҳсларида Баҳодир Жалолов (+92 кг), Ойбек Жўраев (-54 кг), Асадхўжа Мўйдинхўжаев (-67 кг) ўз жангларида ғалаба қозониб, финалга йўл олди. Аълохон Абдуллаев (-75) ва Лазизбек Муллажонов (-92 кг) эса бронза медалини қўлга киритди.
Шунингдек, кечки дастурда Абдумалик Ҳалоков (-57 кг), Руслан Абдуллаев (-63,5 кг) ва Саиджамшид Жаъфаровлар (-71 кг) финал йўлланмаси учун жанг қилади.
Изоҳ (0)