Boks bo‘yicha Jahon chempionatining 10-may kungi bahslarida o‘zbekistonlik yana uch nafar bokschi o‘z jangini o‘tkazdi.
-63,5 kg vazn toifasi vakili Ruslan Abdullayev fransiyalik Lounes Xamraouiga qarshi ringga chiqdi. Mazkur bellashuvda O‘zbekiston vakili 4:1 hisobidagi g‘alabani qo‘lga kiritgandi.
Abdullayev bunga qadar ispaniyalik Oyer Ibarreche, Puerto-Riko vakili Manuel Febus va mavrikiylik Richanro Kolinni mag‘lubiyatga uchratgandi.
-71 kg vazn toifasida harakat qiladigan Saidjamshid Ja’farov mazkur bosqichda Rossiya vakili Igor Sviridchenkovga qarshi jang qildi. Jang to‘liq Ja’farovning ustunligida o‘tdi va hakamlarning barchasi uning g‘alabasini qayd etdi — 5:0.
Saidjamshid avvalgi bosqichlarda mozambiklik Osorio Muxanga, meksikalik Marko Verdeni yenggan, nimchorak finalda Puero-Riko vakili Gabriel Llanosga qarshi jangi esa raqibning jarohati sabab o‘tkazilmagandi.
-92 kg vazn toifasida O‘zbekiston sharafini himoya qilayotgan Lazizbek Mullajonov kubalik tajribali bokschi Xulio Sezar La Kruz bilan to‘qnash keldi. Murosasiz bahsda Mullajonov faolroq harakat qildi va 4:1 hisobida g‘alaba qozondi.
Ma’lumot uchun, la Kruz besh karra jahon chempioni, ikki karra Olimpiya o‘yinlari oltin medal sohibi hisoblanadi.
Lazizbek ushbu bosqichga qadar kolumbiyalik Marlo Xartado va gruziyalik Giorgi Tchigladzeni mag‘lub etishga muvaffaq bo‘lgandi.
Avvalroq Hasanboy Do‘stmatov va Abdumalik Halokov o‘z janglarini g‘alaba bilan yakunlab, yarim finalga yo‘llanma olgandi.
Izoh (0)