Саудия Арабистони Ҳаж зиёратига коронавирус пандемияси туфайли қўйилган чекловларни бекор қилди. Бу ҳақда қиролликнинг Ҳаж ва умра ишлари вазири Тавфик ал-Робия маълум қилди.
«Ҳаж зиёратига борувчилар сони пандемиядан аввалги даражага қайтади, ёш чекловлари ҳам бўлмайди», — деди вазирлик раҳбари.
Вазирнинг сўзларига кўра, бутун дунёдан келадиган диндорлар Саудия Арабистонида хизмат кўрсатиш ваколатига эга исталган компания билан яна шартномалар тузиши мумкин.
«Биз ҳамкорларимиз билан биргаликда зиёратчиларнинг ташриф тартиб-таомилларини осонлаштириш учун НУСК платформасини ишга туширдик», — дея қўшимча қилди ал-Рабия.
Саудия Арабистони расмийлари COVID-19 сабабли сўнгги уч йил давомида Ҳажга келадиган зиёратчилар сонига чеклов қўйганди.
«Ал-Арабия»нинг эслатишича, 2019 йилда 2,6 миллионга яқин киши Ҳаж зиёратини адо этган. Бироқ пандемия фонида қироллик расмийлари 2020 ва 2021 йилларда фақат чекланган миқдордаги зиёратчиларга, 2022 йилда эса 1 миллион кишига Ҳажга келишга рухсат берган. Шу билан бирга, 2022 йилда фақат 18 ёшдан 65 ёшгача бўлган, тўлиқ эмланган ёки коронавирусга қарши иммунитетга эга, сурункали касалликлари бўлмаган шахслар Ҳаж зиёратини адо этиши мумкин эди.
2023 йилда Ҳаж зиёрати 26 июндан бошланиши керак.
Изоҳ (0)