АҚШ ва Япония қуролли кучлари ўз қўмондонлик тузилмаларини тезкорлик билан интеграциялаштириб, қўшма операцияларини кенгайтирмоқда, чунки Вашингтон ва унинг Осиёдаги иттифоқдошлари Хитой ва Тайваннинг эҳтимолий низосига тайёрланмоқда. Бу ҳақда Financial Times хабар берди.
Денгиз пиёдалари учинчи экспедиция корпуси қўмондони генерал-лейтенант Жеймс Бирман айтишича, Америка ва Япония армияси сўнгги бир йил ичида сезиларли даражада ўсган.
Унинг сўзларига кўра, АҚШ ва унинг Осиёдаги иттифоқдошлари Ғарб мамлакатларига Украинани Россия билан урушда қўллаб-қувватлаш имконини берган асосдан нусха олган ва шу тарзда Хитойнинг Тайванга бостириб кириши каби сценарийларга тайёрланмоқда.
Бундан ташқари, Япония ва АҚШ янги авлод ядро реакторларини ишлаб чиқишда ҳамкорлик қилади. Япония ва АҚШ 9 январь куни энергетика вазирлари даражасидаги музокаралар чоғида янги авлод ядро реакторларини ишлаб чиқишда икки томонлама ҳамкорликни мустаҳкамлаш ҳақида келишиб олди, деб ёзади Kyodo агентлиги.
Япония саноат вазири Ясутоси Нисимура ва АҚШ энергетика вазири Женнифер Гренхолм Токио ва Вашингтон кейинги авлод такомиллаштирилган реакторларини, шу жумладан, «мамлакатларнинг ҳар бирида, шунингдек, учинчи мамлакатларда» кичик модулли реакторларни ишлаб чиқиш ва қуриш соҳасидаги ҳамкорликни кучайтириши ҳақида келишиб олди.
Музокаралардан кейин журналистлар қаршисида нутқ сўзлаётиб, Нисимура Америка томони Япониянинг ядро энергетикаси соҳасидаги декарбонизацияни кучайтиришга қаратилган ўзгаришларни ижобий баҳолаганини айтди.
Ўтган ойда Япония ҳукумати зарурат юзага келган тақдирда, эски ядро реакторлари янгиланишини, шу тариқа, уларнинг эксплуатация муддати 60 йилга узайтирилишини маълум қилганди.
Томонлар, шунингдек, суюлтирилган табиий газ етказиб бериш ва энергетика хавфсизлиги бўйича бошқа масалаларда янада яқинроқ ҳамкорлик қилишини айтди.
Изоҳ (0)