АҚШ Россиянинг кейинги ҳужумларига тайёргарлик доирасида Украинага Stryker зирҳли жанговар машиналари партиясини юбориш имкониятини кўриб чиқмоқда. Бу ҳақда Politico ўз манбаларига таяниб хабар берди.
Нашрнинг ёзишича, АҚШ маъмурияти кейинги ҳафта охирида янги ёрдам пакетини эълон қилиши мумкин. Stryker зирҳли машиналари ушбу пакетга киритиладими ёки йўқ, ҳали номаълум, чунки якуний қарор ҳали қабул қилинмаган. Шу билан бирга, газета суҳбатдошлари маъмурият ушбу бронетранспортёрларни кейинги пакетда жўнатиши мумкинлигини таъкидлаган.
Январь ойи бошида АҚШ Украинага 50 та Bradley жанговар машинасини етказиб бермоқчилиги маълум бўлганди. Таққослаш учун, Stryker зирҳли машиналари жанговар ҳаракатларда унчалик самарали эмас, лекин бошқа афзалликларга эга. Politico таъкидлашича, Stryker Bradley’дан кўра шовқинсиз ҳаракатланади ва кўпроқ — 9 нафар аскарни олиб юришга қодир (Браделй 6 нафар).
«Украиналикларга бронетранспортёрлар керак, улар эса бизда бор. Stryker танклар билан жанг қилиш борасида Браделй каби самарали эмас, лекин пиёда аскарларни ҳимоя қилиш ва жангда ҳаракатланиш учун яхши», — деди АҚШ Мудофаа вазирлиги вакили.
Аввалроқ Politico зирҳли техника етказиб берилгандан сўнг АҚШ Украинага танк етказиб беришни бошлаши мумкинлигини ёзганди.
2023 йил бошида Франция Украинага AMX-10 RC броноавтомобилларини (енгил ёки ғилдиракли танклар деб ҳам аталади) етказиб беришини эълон қилди. Кўп ўтмай, Германия Marder жанговар машиналари ва Patriot зенит-ракета тизимлари батареяларини етказиб беришини эълон қилди.
Украина расмийлари Россия яқин ойларда кенг кўламли ҳужум бошлашини кутмоқда. Ўз навбатида, Украина разведкаси бунинг учун Россия расмийлари яна 500 минг кишини сафарбар қилиши мумкинлигини айтмоқда.
Изоҳ (0)