Европа инвестиция банки (EИБ) Украинани реконструкция қилиш дастури сифатида илгари коронавирус пандемияси даврида фойдаланилган тузилмани таклиф қилмоқда.
Вайрон бўлган инфратузилмани тиклаш учун 100 млрд еврогача сармоя киритиш таклиф қилинмоқда, дея хабар бермоқда Reuters.
Европа Иттифоқи—Украина траст фонди грантлар, кредитлар ва кафолатлар шаклида ЕИ мамлакатлари ва ЕИ бюджетидан 20 млрд евро миқдоридаги дастлабки бадалларни олишга интилади.
Кафолатлар мултипликатив таъсирга эга бўлади, натижада умумий қиймати 100 млрд еврога яқин инфратузилма лойиҳалари амалга оширилади, бу Украинанинг бевосита эҳтиёжларининг ярмини ташкил қилади.
EИБ таклифи душанба, 4 июль куни, Швейцарияда Украинани қайта тиклаш бўйича халқаро конференциянинг биринчи кунида эълон қилиниши режалаштирилган.
Банкнинг мақсади Киевни ресурслар билан таъминлаш ва урушдан кейинги реконструкцияда ёрдам беришдир.
EИБ кичик ва ўрта бизнесни молиялаштиришни кафолатлаш учун COVID-19 пандемияси даврида фойдаланилгани каби ишлайдиган фонд ташкил этишни таклиф қилмоқда. Жамғарма 25 млрд евро ажратишни кўзда тутган.
Таклиф этилаётган дастур кўприкларни қайта қуриш, сув таъминоти ва канализация тизимларини тиклашга ёрдам бериши мумкин.
Бу асосан Россия ҳарбий амалиёти бошланганидан бери Украинанинг бошқа қисмларидан миграция туфайли аҳолиси кўпайган шаҳарлар учун жуда ҳам зарурдир.
Агентликнинг таъкидлашича дастлабки инвестициялар йил охиригача тасдиқланиши мумкин.
Режани амалга ошириш учун аввало Европа комиссияси ўз розилигини бериши, сўнгра ташаббус Европа Иттифоқи давлатларининг аксарияти томонидан маъқулланиши керак.
Кейинчалик ЕИ давлатлари Украинага ёрдам фондига ҳисса қўшиш-қўшмаслик тўғрисида мустақил равишда қарор қабул қилади.
Ўтган ҳафтада Украина президентининг идораси мамлакат инфратузилмаси ва иқтисодиётини тиклашни 1 трлн долларга баҳолади.
Май ойи бошида президент Владимир Зеленский Украинани тиклаш харажатларини 600 млрд долларга, апрель ўрталарида эса 550 млрд долларга баҳолаган эди.
Изоҳ (0)