АҚШ президенти Дональд Трампнинг рейтинги Россия президенти Владимир Путин билан Аляскада ўтказилган учрашувдан кейин кескин ошди. Бу ҳақда Insider Advantage тадқиқот хизмати ўтказган сўровнома натижалари маълум қилди.
Маълумотларга кўра, саммитдан сўнг Америка раҳбарининг маъқулланиш рейтинги 54 фоизга етган. Респондентларнинг 44 фоизи унинг фаолиятини маъқулламайди, 2 фоизи эса ўз фикрини билдирмаган.
Таъкидланишича, Трампнинг кўрсаткичлари афроамерикаликлар ва лотин америкаликлар орасида яхшиланди, оқ танли аҳоли орасида эса унинг қўллаб-қувватланиши деярли рекорд даражадаги 64 фоизга етган.
Insider Advantage сўровномаси 15-17 август кунлари ўтказилган бўлиб, унинг хатолик чегараси 3,09 фоиз бандни ташкил этган.
YouGov тадқиқот хизматининг июль ойи ўрталарида эълон қилинган маълумотларига кўра, сўровда қатнашганларнинг атиги 41 фоизи АҚШ президенти фаолиятини қўллаб-қувватлаган, америкаликларнинг тахминан 55 фоизи эса уни маъқулламаганди.
15 август куни АҚШ ва Россия президентлари Аляскадаги Элмендорф-Ричардсон ҳарбий-ҳаво кучлари базасида Украинадаги урушни тугатиш бўйича “учга уч” форматидаги музокаралар ўтказди. Бу Россия Федерациясининг Украинага кенг кўламли босқини бошланганидан бери АҚШ ва Россия раҳбарларининг илк учрашуви эди.
Изоҳ (0)