Фаластин ҳукумати яқин келажакда Ғазо секторини бошқариш учун вақтинчалик қўмита тузилишини эълон қилади. Бу ҳақда Фаластин бош вазири Муҳаммад Мустафо Миср ва Ғазони боғловчи Рафаҳ чегара-ўтказиш пунктида Миср ташқи ишлар вазири Бадр Абдулати билан ўтказилган қўшма матбуот анжуманида маълум қилди.
“Тез орада Ғазо секторини бошқариш учун вақтинчалик қўмита тузилишини эълон қиламиз”, деди Мустафо, Рафаҳ чегара-ўтказиш пункти Ғазо аҳолиси учун ҳаётий муҳим йўл бўлиши кераклигини таъкидлаб.
У Исроилнинг аҳолини озиқ-овқатдан маҳрум қилиш ва мажбурий кўчиришга қаратилган сиёсати мақбул эмаслигини ва бу тўхтатилиши кераклигини қайд этган.
Бош вазир Исроилни қамал ва озиқ-овқат етказиб беришни тўхтатиш сиёсатидан воз кечишга мажбур қилиш учун халқаро ҳамжамият янада фаолроқ ҳаракат қилиши зарурлигини таъкидлаган.
Буни кечиктиришга вақт йўқ. Вақтинча қўмита Ғазода “уюшган сиёсий тузилма” яратиш ўрнига, ҳокимият ҳужумларни тўхтатиш ва анклавни тиклаш учун мавжуд расмий муассасаларни қайта тиклашга эътибор қаратади, деди Муҳаммад Мустафо.
Бундан ташқари, Фаластин бош вазири Миср билан Қоҳирада Исроил ҳужумлари оқибатида вайрон бўлган Ғазо секторини тиклаш масалаларига бағишланган анжуманни ташкил этиш бўйича ҳамкорлик давом этаётганини маълум қилди.
Ғазо сектори 2023 йил октябрь ойидан бери Исроил ва ҲАМАС ўртасидаги ҳарбий ҳаракатлар туфайли ўткир инсонпарварлик инқирози ҳолатида. Фаластин миллий маъмурияти аввалроқ можаро тугаганидан сўнг анклав бошқарувини ўз зиммасига олишга тайёрлигини маълум қилган эди, бироқ янги ҳокимият тузилмасини шакллантириш жараёни турли сиёсий кучлар ўртасида баҳс-мунозараларга сабаб бўлмоқда.
Изоҳ (0)