Қаҳрамонимиз Нодирабегим Мусаева бор-йўғи 23 ёшда, у Фонд бозорининг ахборот ресурс марказида биринчи даражали дастурчи бўлиб ишлайди. Олти тилда мустақил сўзлашоладиган дастурчи қизнинг муваффақият сирлари билан қизиқдик.
“Шунчаки омадимни синаб талаба бўлдим”
— Ишга киришимда кўп тилларни билишим қўл келди. Она тилимдан ташқари, рус, инглиз, корейс, немис ва турк тилларини биламан. Тил ўрганишни жуда эрта бошлаганман. Мактабни тамомлаб, Тошкент давлат юридик коллежига ўқишга кирганман. Юрист бўлиш ниятим бўлган, аммо иккинчи курсда ўқиётганимда аниқ фанларга қизиқишим баланд эканлигини англаганман. Шунчаки омадимни синаш учун хориждаги институтларга кириш учун имтиҳон топширганман. Жанубий Кореядаги университетларнинг бирига грант асосида ўқишга қабул қилинганман. Аммо ҳали коллежни тамомламаганим ва оилавий шароитимиз сабаб банк ҳисоб рақамимга 15 000 АҚШ доллари миқдоридаги маблағни депозит сифатида қўёлмаганман. Бундан ташқари, ёш бўлганлигим учун ота-онам ҳам хорижга ўқитишга жўнатишни исташмаган. Бу мени бир оз тушкунликка туширган.
“Грант-ку, ҳеч нарса йўқотмайман”
— Коллежни тамомлаб август ойида хориж университетларининг Ўзбекистондаги филиалларига ҳужжат топширганман. Улар орасида Тошкент шаҳридаги Туркиянинг Иқтисодиёт ва технологиялар университети ҳам бор эди. Имтиҳонлар икки босқичда ўтказилган, математика ва инглиз тилидаги билимларимизни синовдан ўтказишган. Кўп вақт ўтмай грант асосида ўқишга қабул қилинганим ҳақида хабар келган. “Грант-ку, ҳеч нарса йўқотмайман”, деб дарсларга борганман. У ердаги ўқитиш услуби маъқул келгани учун қизиқишим яна-да ортган.
“Хорижлик устозлар сабоқ беришди”
— Мен университетга ҳужжат топширган вақтим: “Халқаро бизнес ва тадбиркорлик”, “Электрон тижорат ва технологияларни бошқариш” факультетлари бор эди. Ҳозирда улар сафи янада ортиб, архитектура ва саноат муҳандислиги факультетлари ҳам очилган. Менимча ҳозир танлаш имкони бўлганида, айнан саноат муҳандислиги йўналишида ўқиган бўлардим.
Турк тилини ўрганишимга университетдаги дарслар ҳам сабаб бўлди. Чунки дарслар инглиз ва турк тиллларида бўлади. Педагогларнинг асосий қисмини хорижлик устозлар ташкил этади. Иккинчи курсда турк тилини ўрганганимиз, Туркияга бориб ўқишимизда жуда қўл келган.
“Магистратурани Кореяда давом эттираман”
— Ҳаётимда “Университет талабани кучли қилади ёки синдиради”, деган гап ўз тасдиғини топди. Мен ТОББ ЭТÜда ўқиб, кучли инсон ва кадр бўлиб етишдим. Университетни қизил диплом билан тамомладим, бу магистратурага грант асосида ўқишга қабул қилинишимга катта ёрдам берди. Жанубий Кореянинг топ ўнталикка кирувчи университетида ўқиш имкониятига эга бўлдим. Бу университетга Ўзбекистондан тўрт киши ҳужжат топширдик. Улар орасида айнан мени ўқишга қабул қилишди. Шу кунларда робототехникага қизиқишим ортган, балки бу соҳада ҳам ўқиб, билимимни оширарман, дейди Нодирабегим Мусаева.
Изоҳ (0)