“Заковат” III Осиё очиқ чемпионати: 200 миллион сўм ўз эгаларини топди

Бишкек мезбонлигида ўтказилган “Заковат” интеллектуал ўйинининг III Осиё очиқ чемпионати ғолиблари маълум бўлди. Икки кун давом этган баҳслар ҳаяжонли ва эмоцияларга тўла руҳият билан ўтди.

Турнирда Ўзбекистон, Қозоғистон, Қирғизистон, Тожикистон ва Россиядан келган билимдонлар ўз билимларини синовдан ўтказишди. 

Турнирнинг асосий баҳси — “Заковат” ўйинида 6 та тур ўтказилди. Якунда чемпионлик Қозоғистоннинг “Интеллект-экипаж” жамоаси га насиб қилиб, III Осиё очиқ чемпионати кубоги ҳамда 100 миллион сўм пул мукофотига эга чиқишди. 

Иккинчи ўринни ҳамда 60 миллион сўмни “ОНК” жамоаси ўз ҳисобига расмийлаштириб қўйди. Учинчи ўрин учун қўйилган 40 миллион сўмни эса “Элизабет Перриш” жамоаси “илиб кетди”. 

Яна бир жамоавий баҳс “Brain ring” ўйинининг финал баҳсида Қозоғистонинг “ОНК” жамоаси ҳамда Ўзбекистондан иштирок этган “Мистерия” жамоаси чемпионлик учун куч синашишди. Якунда чемпионлик “ОНК”га, иккинчи ўрин эса ватандошларимизга насиб қилди. Учинчи ўринларнинг ҳар иккиси Қозоғистондан келган “Интеллект-экипаж” ва “Brain Аrt” жамоаларига тегди.

Шунингдек, турнирнинг “Шахсий ўйин” яккалик баҳсларида “энг кучли билимдон” унвонига россиялик Серафим Шибанов сазовор бўлди. Иккинчи ўринни Азат Тургунов ва учинчи ўринни Денис Галиакберов эгаллади.

“Турнир ҳақидаги таассуротлар ажойиб! Айниқса, бу ерда фақат Қозоғистон ва Ўзбекистон эмас, балки бошқа мамлакатлардан ҳам ёшлар йиғилганидан хурсандмиз. Кўп янги танишувлар, ажойиб ташкилот ва муҳит. Асосий турнирни интиқлик билан кутамиз ва “Заковат” ҳаракатига миннатдорлик билдирамиз!”, дея илиқ фикрларини айтиб ўтди “ОНК” жамоаси аъзоси Денис Галиакберов.

Барча иштирокчилар ўзгача ҳиссиётларни ҳамда янгидан-янги билимларни тақдим этаётган турнир ташкилотчиларига ўз миннатдорлик изҳор қилди. Шунингдек, мезбонлар олдинда кутиб турган Zakovat Asian Cup II да ҳам бундан-да юқори атмосфера бўлишига ишонч билдиришмоқда.

Маълумот ўрнида айтиш керакки, 20 август куни Қирғизистон пойтахти яна бир муҳим интеллектуал тадбир — Zakovat Asian Cup II га ҳам мезбонлик қилади. Ушбу тадбирда ўзбекистонлик ва қирғизистонлик билимдонлар яна бир бор ўзаро куч синашадилар.