Yevropa investitsiya banki (EIB) Ukrainani rekonstruksiya qilish dasturi sifatida ilgari koronavirus pandemiyasi davrida foydalanilgan tuzilmani taklif qilmoqda.
Vayron bo‘lgan infratuzilmani tiklash uchun 100 mlrd yevrogacha sarmoya kiritish taklif qilinmoqda, deya xabar bermoqda Reuters.
Yevropa Ittifoqi—Ukraina trast fondi grantlar, kreditlar va kafolatlar shaklida YI mamlakatlari va YI budjetidan 20 mlrd yevro miqdoridagi dastlabki badallarni olishga intiladi.
Kafolatlar multiplikativ ta’sirga ega bo‘ladi, natijada umumiy qiymati 100 mlrd yevroga yaqin infratuzilma loyihalari amalga oshiriladi, bu Ukrainaning bevosita ehtiyojlarining yarmini tashkil qiladi.
EIB taklifi dushanba, 4-iyul kuni, Shveysariyada Ukrainani qayta tiklash bo‘yicha xalqaro konferensiyaning birinchi kunida e’lon qilinishi rejalashtirilgan.
Bankning maqsadi Kiyevni resurslar bilan ta’minlash va urushdan keyingi rekonstruksiyada yordam berishdir.
EIB kichik va o‘rta biznesni moliyalashtirishni kafolatlash uchun COVID-19 pandemiyasi davrida foydalanilgani kabi ishlaydigan fond tashkil etishni taklif qilmoqda. Jamg‘arma 25 mlrd yevro ajratishni ko‘zda tutgan.
Taklif etilayotgan dastur ko‘priklarni qayta qurish, suv ta’minoti va kanalizatsiya tizimlarini tiklashga yordam berishi mumkin.
Bu asosan Rossiya harbiy amaliyoti boshlanganidan beri Ukrainaning boshqa qismlaridan migratsiya tufayli aholisi ko‘paygan shaharlar uchun juda ham zarurdir.
Agentlikning ta’kidlashicha dastlabki investitsiyalar yil oxirigacha tasdiqlanishi mumkin.
Rejani amalga oshirish uchun avvalo Yevropa komissiyasi o‘z roziligini berishi, so‘ngra tashabbus Yevropa Ittifoqi davlatlarining aksariyati tomonidan ma’qullanishi kerak.
Keyinchalik YI davlatlari Ukrainaga yordam fondiga hissa qo‘shish-qo‘shmaslik to‘g‘risida mustaqil ravishda qaror qabul qiladi.
O‘tgan haftada Ukraina prezidentining idorasi mamlakat infratuzilmasi va iqtisodiyotini tiklashni 1 trln dollarga baholadi.
May oyi boshida prezident Vladimir Zelenskiy Ukrainani tiklash xarajatlarini 600 mlrd dollarga, aprel o‘rtalarida esa 550 mlrd dollarga baholagan edi.
Izoh (0)