Ижтимоий тармоқларда ИИО ходимлари ва фуқаролар ўртасида можаро акс этган видео тарқалиб, турли муҳокамаларга сабаб бўлди. Ушбу ҳолат юзасидан Тошкент шаҳар ИИББ маълумот берди.
Қайд этилишича, жорий йилнинг 16 август куни соат 21.40 ларда Олмазор тумани Қорақамиш 1/3 даҳасида тунги хизматга жалб қилинган профилактика инспектори Ш.Қурбонов ва патрул-пост хизмати инспектори А.Мамадалиев хизмат олиб бораётган вақтида уч нафар фуқаро йўл четида тўхтаб турган Malibu русумли автомашина ойнасининг қорайтирилган плёнкасини шилаётганини кўришган.
Ҳодимлар улардан автомашинанинг эгаси кимлигини суриштириб, ҳужжатларни тақдим этишни сўраганида 2005 йилда туғилган У.М. ички ишлар органлари ходимларининг қонуний талабларини бажармасдан, автомашина эшигини қулфлаб, ҳеч қандай ҳужжатларни тақдим этмай, уларга фаол қаршилик кўрсатган.
Фуқаро воқеа жойидан қочишга уринган, аммо ходимлар томонидан қўлга олиниб, туман ИИО ФМБга олиб борилган. Текширув жараёнида автомашина У.М.нинг акаси Р.М.га тегишли эканлиги аниқланган.
Мазкур ҳолат юзасидан Олмазор тумани ИИО ФМБ томонидан У.М.га нисбатан Маъмурий жавобгарлик тўғрисидаги кодексининг 194-модда ва 195-моддаси билан маъмурий баённома расмийлаштирилган. Тўпланган ҳужжатлар эса қонуний чора кўриш учун Жиноят ишлари бўйича туман судига юборилган.
Аввалроқ Сирдарёда Cobalt олиб қочган икки йигит уларни тўхтатишга ҳаракат қилган ИИБ ходимини пичоқлаб, унинг Matizъини ҳайдаб қочиб кетишгани тўғрисида хабар қилинганди. Улар кейинроқ тўхташ ишорасини берган ЙПХ инспекторини ҳам машинада уриб юборган.
Изоҳ (0)