Tesla электромобилларини етказиб бериш икки йил ичида биринчи марта қисқарди

Tesla компанияси 2022 йилнинг иккинчи чорагида бутун дунё бўйлаб 254 695 та электромобиль етказиб берди. Бу ҳақда Bloomberg хабар берди.

Компания икки йилдан бери биринчи марта чоракдан чоракка пасайиш кўрсатди. Бу эса Шанхайдаги заводда COVID билан боғлиқ ишлаб чиқариш жараёнининг тўхтатилиши оқибатида юзага келди. 

Уч ой олдин Tesla рекорд даражада 310 048 та электромобиль етказиб берган эди. Ўтган йилнинг шу чорагида бу кўрсаткич 201 250 та эди. 

Етказиб бериш маълумотлари Tesla учун диққат билан кузатиладиган кўрсаткичдир, чунки у компаниянинг молиявий кўрсаткичлари ҳақида маълумот беради. 

Tesla бош ижрочи директори Илон Маск йил бошида 2022 йилда ишлаб чиқариш 1,5 млн донадан ошишини кутаётганини айтган эди. 

Электромобиль ишлаб чиқарувчиси учун АҚШ ва Хитой узоқ вақтдан бери энг йирик бозор бўлиб келмоқда. 

Компания ҳозирда Model S, Х, 3 ва Y автомобилларини ишлаб чиқаради. Tesla кейинчалик пикап, ярим юк машинаси ва йўлтанламас ишлаб чиқаришни йўлга қўйишни режалаштирмоқда.

Tesla иккинчи чораги бўйича тўлиқ ҳисоботни 20 июль куни эълон қилади.