Исроилнинг Ғазо секторига ҳужуми ва бомбардимонлари ортиб бориши ҳақидаги хавотирлар кучаймоқда. Қўрқув билан яшаётган минглаб фаластинликлар ўз уйларини ташлаб, Ғазонинг шарқидан ғарбий ва жанубий ҳудудларга кўчиб кетмоқда. Бу ҳақда Reuters агентлиги хабар берди.
Манбага кўра, Исроилнинг Ғазо шаҳрини тўла назоратга олиш режаси хорижда ҳам, мамлакат ичида ҳам хавотир уйғотган. Исроилда ўн минглаб одамлар уруш бошланганидан бери кузатилган энг йирик норозилик намойишларидан бирида қатнашиб, жангларни тугатиш ва Ғазода фаластинликлар қўлида қолаётган 50 нафар гаровни озод қилиш бўйича келишув тузилишини талаб қилишди.
Миср ва Қатар воситачиларни сулҳ юзасидан ҳаракатларни жадаллаштиришга ундади. Қоҳирада ҲАМАС озодлик кучлари билан олиб борилган музокараларга яқин манбанинг айтишича, бу тинчлик учун охирги уриниш бўлиши мумкин.
Исроил бош вазири Биньямин Нетаньяху Ғазо шаҳрини ҲАМАС озодлик кучларининг сўнгги йирик таянч пункти сифатида тасвирлаган. Исроил Ғазонинг 75 фоизини назорат қилиб турибди. Ҳарбий ҳужумни кенгайтириш гаровдагиларни хавф остига қўйиши ва аскарларни узоқ давом этадиган, қурбонларга бой партизан урушига тортиши мумкин.
Ғазо шаҳрида кўплаб фаластинликлар ҳам урушни тугатишни талаб қилиш ва Исроилнинг қуруқликдаги ҳужумини олдини олиш учун ҲАМАСни музокараларни кучайтиришга ундовчи намойишлар ўтказишга чақирмоқда.
Исроилнинг Ғазо шаҳрига бостириб кириши юз минглаб одамларнинг кўчирилишига сабаб бўлиши мумкин. Уларнинг кўпчилиги уруш давомида бир неча бор уйидан қувғин қилинган.
Байт Лаҳия шаҳридаги бошпана раҳбари Аҳмад Мехейсаннинг сўзларига кўра, сўнгги кунларда 995 та оила Ғазонинг жанубига йўл олган. Мехейсаннинг таъкидлашича, фавқулодда бошпана учун 1,5 миллионта чодир керак. Бироқ шу йилнинг январь–март ойларидаги сулҳ доирасида Исроил Ғазога 120 мингта чодир киритилишига рухсат берган, холос. Бирлашган Миллатлар Ташкилотининг гуманитар идораси Ғазода 1,35 миллион киши аллақачон фавқулодда бошпана воситаларига муҳтож эканини билдирган.
“Ғазо шаҳридаги одамлар ўлим жазоси чиқиб, ижросини кутаётган кишига ўхшайди. Мен бугун ёки эртага ота-онам ва оиламни жанубга кўчирмоқчиман. Тўсатдан босқин бўлса, уларнинг биронтасини йўқотиш хавфини кўтара олмайман”, — деган Ғазо шаҳри тадбиркори Томер Бурай.
Ғазо шаҳрида турли касаба уюшмалари норозилик намойиши ўтказишни режалаштирмоқда. Ижтимоий тармоқларда ҳам одамлар қатнашишга ваъда беришган. Бу эса ҲАМАСга нисбатан босимни ошириши мумкин. Сўнгги сулҳ музокаралари июль охирида муваффақиятсиз якунланган, томонлар унинг барбод бўлишида бир-бирини айблаган эди.
Манбанинг хулосасига кўра, ҲАМАС воситачиларга АҚШ таклиф этган 60 кунлик сулҳ ва гаровдагиларнинг ярмидан воз кечиш юзасидан музокараларни қайта бошлашга тайёр эканини билдирган. Шу билан бирга, улар урушни бутунлай тугатадиган кенгроқ келишувни ҳам кўриб чиқиш истагини билдирган.
Изоҳ (0)