Қайси ҳудудларда қурилиш ва ишлаб чиқариш корхоналари солиқдан энг кўп қарздорлиги очиқланди

Қурилишда Тошкент шаҳрида, ишлаб чиқаришда Тошкент вилоятида солиқ қарзи энг кўп йиғилиб қолган. Бу ҳақда Солиқ қўмитаси маълум қилди.

Қурилишда солиқдан қарздорлик

2025 йил 1 август ҳолатига кўра, Ўзбекистонда солиқ қарзи 100 миллион сўмдан юқори қурилиш корхоналари сони 1163 тани ташкил этган. Уларнинг жами қарздорлиги 1 триллион сўмдан кўп. Мазкур сумманинг 385,3 миллиард сўми (38 фоиз) солиқ қарзи энг йирик бўлган 10 та корхона ҳисобига тўғри келади.

Республика бўйича мазкур соҳада солиқ қарздорлиги энг кўп ҳудуди Тошкент шаҳри бўлиб қолмоқда. Пойтахтда 100 миллион сўмдан ортиқ қийматдаги 255 та корхонанинг жами 393,1 миллиард сўмлик солиқ қарзлари йиғилиб қолган. Кейинги ўринларни Андижон (123 миллиард сўм) ва Навоий (82,1 миллиард сўм) вилоятлари банд этган.

Энг йирик қарздор корхоналар учталиги қуйидагича:

• “Релиабле строй инвест” МЧЖ — 81,5 миллиард сўм (Тошкент шаҳри);
• “Моҳир қурувчи” МЧЖ — 65,3 миллиард сўм (Андижон вилояти);
• “Азия инвест фаворит” — 63 миллиард сўм (Тошкент шаҳри).

Ишлаб чиқаришда солиқ қарздорлиги

2025 йил 1 август ҳолатига кўпа, мамлакатда солиқ қарзи 100 миллион сўмдан юқори ишлаб чиқариш корхоналари сони 998 тани ташкил этган. Уларнинг жами қарздорлиги 1,1 триллион сўм бўлган. Шундан 284,8 миллиард сўми (24 фоизи) солиқ қарзи энг кўп бўлган 10 та корхона ҳисобига тўғри келмоқда.

Мазкур соҳада ҳудудлар бўйича энг кўп қарздорлик Тошкент вилоятида қайд этилган — 161 та корхонада 223,1 миллиард сўм. Шу билан бирга, Андижон вилоятида 209,3 миллиард сўм, Қорақалпоғистонда 106,1 миллиард сўмлик қарзлар йиғилиб қолган. Энг йирик қарздорлар учлиги қуйидагича:

• “Зумрад техтил” МЧЖ — 91,7 миллиард сўм (Андижон вилояти);
• “Реал агро cоттон” УК 36,5 миллиард сўм (Тошкент вилояти);
• “Навоийазот” АЖ — 26,1 миллиард сўм.

Аввалроқ Ўзбекистонда бюджет ва бошқа ташкилотлар ходимларида мол-мулк ҳамда ер солиғидан қарздорлик 563 млрд сўмдан ортгани хабар қилинганди. Жорий йил апрелда мамлакатда жами 8,5 трлн сўмлик тўланмаган солиқлар борлиги айтилган.

Жорий йил январь июль ойларида ўтказилган текширувларга кўра, мамлакатда савдо ва умумий овқатланиш соҳаларида солиқдан қочиш хавфи энг юқори экани аниқланган.