Тожикистон президенти Эмомали Раҳмон жамиятни мамлакатдаги сиёсий барқарорликни ҳимоя қилишга тайёр туришга чақирди. Бу ҳақда у Миллий бирдамлик кунининг 25 йиллиги муносабати билан халққа йўллаган мурожаатида айтиб ўтди, деб ёзади Asia Plus.
«Давлатимиз ва халқимизнинг хоинлари ва душманлари — миллий ва давлат манфаатларини оёқости қилиб, ўз иймонини ва виждонини чет эллик хўжайинларига сотганлар, ўзларининг ғаразли ниятлари ва режаларидан ҳалиям воз кечгани йўқ», — дейилади Тожикистон етакчиси мурожаатида.
«Шунинг учун биз доим тинчлик, хотиржамлик, сиёсий барқарорлик ва миллий бирликни ҳимоя қилишга тайёр туриб, ғафлатда қолмаслик учун ҳеч қачон сиёсий огоҳликни йўқотмаслигимиз керак», — деди Эмомали Раҳмон.
Унинг эслатишича, ўтган асрнинг 90 йиллари бошида «Тожикистон мажбуран юкланган фуқаролар уруши гирдобига тушиб қолган, оқибатда жамият ва давлат ҳаётининг барча соҳалари фожиали инқирозга дуч келган эди».
Унинг баҳо беришича, тожик халқининг парчаланиб, мамлакатнинг дунё сиёсий харитасидан йўқолиш хавфи бўлган.
«Тинчлик ҳақида узоқ давом этган музокаралар 1997 йил 27 июнда Москвада тарихий ҳужжат — Тожикистонда тинчлик ва миллий розилик ўрнатиш ҳақидаги умумий келишув имзоланиши билан якунланди», — деб эслатди Эмомали Раҳмон.
«Ҳозирги шароитларда, айниқса, инсоният ўта оғир муаммолар билан тўқнаш келаётган сўнгги йилларда, тинчлик ва хотиржамлик аҳамияти ошиб бормоқда, — дея таъкидлади Эмомали Раҳмон. — Глобал иқлим ўзгариши, шу жумладан, бутун дунёда сув тақчиллиги, қурғоқчилик, озиқ-овқат танқислиги ва улар нархининг ошиши ҳамда юқумли касалликлар тарқалиши билан бирга, хавфсизлик муаммолари, терроризм, экстремизм, диний радикализм каби замонавий хавфлар, ноқонуний қурол айланмаси ва наркотиклар, кибержиноятчилик ва бошқа трансмиллий уюшган жиноятлар инсоният ҳаётини жуда тартибсиз ва жуда оғир ҳолатга келтирди».
Эслатиб ўтамиз, 14 май куни Тожикистоннинг Тоғли Бадахшон мухтор вилоятида аҳоли норозилик акциясига чиқиб, вилоят раҳбарининг истеъфосини, Хоруғдаги барча блокпостлар очилишини ва Бадахшон фуқароларини таъқиб қилиш тўхтатилишини талаб қилган эди. Норозилик намойишлари фаол Амриддин Аловацҳоев ва MMA жангчиси Чоршанбе Чоршанбиевга нисбатан суд ҳукмларидан кейин бошланган эди.
18 майда Помирда аксилтеррорчилик операцияси бошлангани эълон қилинди. Комиссия хабарида вилоятдаги норозилик намойиши олдиндан режалаштирилгани ташқи ва ички кучлар ҳудуддаги вазиятни беқарорлаштиришга урингани ҳақида баёнот берган.
Изоҳ (0)