Tojikiston prezidenti Emomali Rahmon jamiyatni mamlakatdagi siyosiy barqarorlikni himoya qilishga tayyor turishga chaqirdi. Bu haqda u Milliy birdamlik kunining 25 yilligi munosabati bilan xalqqa yo‘llagan murojaatida aytib o‘tdi, deb yozadi Asia Plus.
“Davlatimiz va xalqimizning xoinlari va dushmanlari — milliy va davlat manfaatlarini oyoqosti qilib, o‘z iymonini va vijdonini chet ellik xo‘jayinlariga sotganlar, o‘zlarining g‘arazli niyatlari va rejalaridan haliyam voz kechgani yo‘q”, — deyiladi Tojikiston yetakchisi murojaatida.
“Shuning uchun biz doim tinchlik, xotirjamlik, siyosiy barqarorlik va milliy birlikni himoya qilishga tayyor turib, g‘aflatda qolmaslik uchun hech qachon siyosiy ogohlikni yo‘qotmasligimiz kerak”, — dedi Emomali Rahmon.
Uning eslatishicha, o‘tgan asrning 90-yillari boshida “Tojikiston majburan yuklangan fuqarolar urushi girdobiga tushib qolgan, oqibatda jamiyat va davlat hayotining barcha sohalari fojiali inqirozga duch kelgan edi”.
Uning baho berishicha, tojik xalqining parchalanib, mamlakatning dunyo siyosiy xaritasidan yo‘qolish xavfi bo‘lgan.
“Tinchlik haqida uzoq davom etgan muzokaralar 1997-yil 27-iyunda Moskvada tarixiy hujjat — Tojikistonda tinchlik va milliy rozilik o‘rnatish haqidagi umumiy kelishuv imzolanishi bilan yakunlandi”, — deb eslatdi Emomali Rahmon.
“Hozirgi sharoitlarda, ayniqsa, insoniyat o‘ta og‘ir muammolar bilan to‘qnash kelayotgan so‘nggi yillarda, tinchlik va xotirjamlik ahamiyati oshib bormoqda, — deya ta’kidladi Emomali Rahmon. — Global iqlim o‘zgarishi, shu jumladan, butun dunyoda suv taqchilligi, qurg‘oqchilik, oziq-ovqat tanqisligi va ular narxining oshishi hamda yuqumli kasalliklar tarqalishi bilan birga, xavfsizlik muammolari, terrorizm, ekstremizm, diniy radikalizm kabi zamonaviy xavflar, noqonuniy qurol aylanmasi va narkotiklar, kiberjinoyatchilik va boshqa transmilliy uyushgan jinoyatlar insoniyat hayotini juda tartibsiz va juda og‘ir holatga keltirdi”.
Eslatib o‘tamiz, 14-may kuni Tojikistonning Tog‘li Badaxshon muxtor viloyatida aholi norozilik aksiyasiga chiqib, viloyat rahbarining iste’fosini, Xorug‘dagi barcha blokpostlar ochilishini va Badaxshon fuqarolarini ta’qib qilish to‘xtatilishini talab qilgan edi. Norozilik namoyishlari faol Amriddin Alovatshoyev va MMA jangchisi Chorshanbe Chorshanbiyevga nisbatan sud hukmlaridan keyin boshlangan edi.
18-mayda Pomirda aksilterrorchilik operatsiyasi boshlangani e’lon qilindi. Komissiya xabarida viloyatdagi norozilik namoyishi oldindan rejalashtirilgani tashqi va ichki kuchlar hududdagi vaziyatni beqarorlashtirishga uringani haqida bayonot bergan.
Izoh (0)