Эрон БРИКС (Бразилия, Россия, Ҳиндистон, Хитой ва ЖАР) гуруҳига қўшилиш учун ариза берди. Бу ҳақда Tasnim агентлиги мамлакат Ташқи ишлар вазирлиги расмий вакили Саид Хатибзодага таяниб хабар берган.
У Эроннинг БРИКСга аъзо бўлиши ҳар иккала томонга ҳам «қўшимча қулайликлар» келтиришига умид билдирди. Хатибзода қайд этишича, БРИКС мамлакатларининг жаҳон ЯИМдаги улуши 30 фоизни, гуруҳга кирувчи давлатлар умумий аҳолисининг дунё аҳолисига нисбатан улуши эса 40 фоизни ташкил қилади.
Ўтган ҳафта Эрон президенти Иброҳим Раисий Хитой Халқ Республикаси раиси Си Цзиньпиннинг таклифи билан БРИКС+ онлайн саммитида нутқ сўзлаган эди. У «Эроннинг геосиёсий ва геоиқтисодий жойлашуви уни БРИКСнинг барқарор ва ишончли шеригига айлантириши мумкин»лигини айтди.
Аргентина президенти Альберто Фернандес ҳам ўз мамлакатининг бирлашмага қўшилиш истагини билдирди. «Биз ушбу давлатлар гуруҳининг тенг ҳуқуқли аъзоси бўлишга интиляпмиз… Биз хавфсиз ва масъулиятли озиқ-овқат маҳсулотлари етказиб берувчиси ҳамда биотехнологиялар ва амалий логистика соҳасининг обрўли иштирокчисизмиз», — деган эди у 24 июнь куни.
Россия ТИВ расмий вакили Мария Захарова Эрон ва Аргентина БРИКСга қўшилиш учун ариза берганини тасдиқлади. «Оқ уйдагилар дунёда яна нимани ўчириб қўйиш, тақиқлаш ва бузиш ҳақида ўйлаётган пайтда, Аргентина ва Эрон БРИКСга аъзо бўлиш учун аризалар топширди», — деб ёзди у Telegram’да.
Россия президенти ёрдамчиси Юрий Ушаков Москва БРИКСнинг эҳтимолий кенгайишига ижобий қарашини, аммо «бу муаммога жуда эҳтиёткорлик билан, пухталик билан ёндашиш керак»лигини айтди. Россия томони қўшилиш учун нозмзодларга жараёнлар ва талабларни белгилашни таклиф этмоқда, деди у. Ушаковнинг фикрича, биринчи шундай форматлар топиш керакки, улар бошланғич босқичда бирлашма билан кузатувчилар сифатида ҳамкорлик қилиш имконини берсин.
БРИКС 2006 йил июнида Петербург иқтисодий форуми доирасида Бразилия, Россия, Ҳиндистон, Хитой иқтисодиёт вазирлари иштирокида ташкил топган. 2010 йилда унга Жанубий Африка Республикаси қўшилган.
Изоҳ (0)