28 июнь куни БМТ Хавфсизлик кенгаши Украинадаги вазият бўйича фавқулодда йиғилиш ўтказади, деб ёзади «РБК» раислик қилувчи Албания миссиясига таяниб.
«Украина сўнгги кунларда бутун мамлакат бўйлаб шаҳарлар шиддатли тарзда ўққа тутила бошлагач, Хавфсизлик кенгаши раисидан йиғилиш чақиришни сўради», — дейилади кенгаш хабарида. Украинанинг БМТдаги доимий вакили Сергей Кислица учрашув ҳақида сўров киритилганини тасдиқлади.
Украинада хавфсизликни таъминлаш ва тинчликни қўллаб-қувватлаш масаласи бўйича мажлис 28 июнь куни 15:00 (Тошкент вақти билан 29 июнь 00:00)да бошланади.
Мажлисда Хавфсизлик кенгаши аъзолари Украинанинг Полтава вилояти Кременчуг шаҳридаги вазиятни муҳокама қилади, деб ёзди АҚШнинг БМТдаги доимий вакили Линда Томас-Гринфилд Twitter’да.
27 июнь куни Кременчугдаги «Амстор» савдо марказига ракета келиб тушди ва 10 минг метр квадрат майдонда ёнғин бошланди.
Украина президенти Владимир Зеленскийнинг сўзларига кўра, сиреналар ёқилиши арафасида бинода мингдан ортиқ одам бўлган, уларнинг кўпчилиги эвакуация қилинган. 28 июнга ўтар кечаси олинган маълумотларга кўра, 16 киши ҳалок бўлган. Яна 59 киши жабрланган, уларнинг 25 нафари касалхонага жойлаштирилган.
БМТ матбуот котиби Стефан Дюжаррик савдо марказига қилинган ҳужумни ўта қайғули деб атади. «Ҳар қандай фуқаролик инфратузилмаси ҳеч қачон ҳужумларга учрамаслиги керак, бу инфратузилма, албатта, савдо марказлари ва оддий фуқароларни ўз ичига олади», — деди у.
Россия Украинадаги ҳарбий операцияни 24 февраль куни бошлади. Мудофаа вазирлиги россиялик ҳарбийлар фақат ҳарбий инфратузилмага зарбалар бераётганини маълум қилганди.
Изоҳ (0)