Москвада полиция мухолифатчи сиёсатчи, Москванинг Красносельский тумани муниципал депутати Илья Яшинни қўлга олди, деб хабар бермоқда Meduza журналист Ирина Баблоянга таяниб.
«Дўстим Илья Яшин билан Хамовникидаги боғда сайр қилиб юргандик. Полициячилар келиб, Ильяни номаълум томонга олиб кетди», — деб ёзди Баблоян ўз Telegram-каналида.
«ОВД-Инфо» сиёсатчининг исми ошкор этилмаган дўстига таяниб хабар беришича, Яшин «Лужники» ички ишлар бўлимига келтирилган.
Адвокат Вадим Прохоров маълум қилишича, мухолифатчига нисбатан «полиция ходимининг қонуний буйруғига итоат қилмаслик» маъмурий моддаси илгари сурилмоқда, у 15 суткагача муддатга қамалиши мумкин.
Илья Яшин — Россияда қолган ва Украина билан урушга очиқдан-очиқ қарши чиқаётган камдан-кам мухолифатчи сиёсатчилардан бири.
Май ойида Илья Яшинга нисбатан Россия армиясини «обрўсизлантирганлик» ҳақидаги маъмурий модда бўйича тўртта протокол тузилган эди. «Тушунишимча, менга йирик жарима ва истиқболда — жиноий таъқиб хавф солмоқда. Нима ҳам дердим, менинг позициям оддий. Ҳеч кимдан қочиб, бекинмоқчи эмасман, ўз гапларимдан ҳам тонмайман», — деган эди ўшанда сиёсатчи. Кейинроқ у тўртта протоколдан учтаси бўйича 90 минг рубль жаримага тортилган эди.
Апрель охирида Яшин армия ҳақидаги «фейклар» иши бўйича гувоҳ сифатида сўроқ қилинган. Ушбу иш бўйича Москванинг аввал Яшин раҳбарлик қилган Красносельский муниципал округи раҳбари Елена Котёночкина ва округ депутати Алексей Горинов айбланмоқда. Депутатлар кенгаши мажлисларидан бирида улар Украинадаги урушни уруш деб, Россия армияси ишини эса «фашист давлатининг хатти-ҳаракатлари» деб атаган. Котёночкина ҳозир чет элда, Горинов эса тергов изоляторида.
Изоҳ (0)