Қайиқ билан Европага йўл олган 75 дан ортиқ муҳожир Ўрта Ер денгизининг Ливия соҳиллари яқинида чўкиб кетди. Бу ҳақда Халқаро миграция ташкилотининг (ХМТ) Ливиядаги ваколатхонасига таяниб, «РИА Новости» хабар берди.
ХМТ ўзининг Twitter’даги саҳифасида Европага қайиқда етиб бормоқчи бўлган 75 дан ортиқ муҳожир Ливия қирғоқлари яқинида чўкиб кетганини ёзган. Ташкилот маълумотларига кўра, яна 15 киши балиқчилар томонидан қутқарилиб, қуруқликка олиб келинган.
Ташкилот хабарида таъкидланишича, 2021 йил Ўрта Ер денгизида 1300 дан ортиқ қочқин ҳалок бўлган.
Сентябрь бошида Ливиянинг ғарбий соҳиллари яқинида 91 нафар ноқонуний муҳожир қутқариб олинганди. Қайд этилишича, Эфиопия ва Эритрея аҳолисидан иборат муҳожирлар гуруҳи резина қайиқда, жуда кам озиқ-овқат билан икки кун денгизда сузган. Қутқариб олингач улар Триполига олиб кетилган.
Маълумот учун 2011 йилда Ливия раҳбари Муаммар Каддафи ағдарилиб, қатл этилганидан сўнг, Ливия ўзининг ягона бошқарувга эга давлат сифатидаги фаолиятини тўхтатди. Шу билан бирга, мамлакат Европага ўтмоқчи бўлган ноқонуний муҳожирлар учун транзит пунктига айланди.
Изоҳ (0)