Москвадаги Кутузовский проспектида блогер Саид Губденский бошқарувидаги BMW автомобили қарама-қарши йўналишга чиқиб кетиб, Volvo ва Mercedes билан тўқнашди. Губденский воқеа жойида вафот этган, деб ёзади Meduza.
Шунингдек, блогернинг машинасида бўлган «Доғистон автомобиль ва мотоцикл спорти федерацияси» жамоат ташкилоти президенти Заур Ибрагимов ЙТҲда олган жароҳатлари туфайли кейинроқ шифохонада вафот этди. Доғистон спорт вазирлиги Ибрагимовнинг вафоти муносабати билан ҳамдардлик билдирди.
Москва бўйича Ички ишлар вазирлиги Бош бошқармасининг дастлабки маълумотларига кўра, воқеа Губденскийнинг айби билан содир бўлган. «ТАСС»нинг ҳуқуқ-тартибот идораларидаги манбаси аниқлик киритишича, аварияга ҳаракатнинг рухсат этилган тезликдан ошиб кетгани ва ҳаддан ортиқ нотекислиги — «шашка ўйини» сабаб бўлган.
Саид Губденский автомобиллар ҳақида блог юритарди. Унинг YouTube каналида 250 мингдан ортиқ, Instagram саҳифасида эса 500 мингдан ортиқ обуначиси бор. Унинг ижтимоий тармоқдаги блогларида, хусусан, Москва кўчаларидаги пойга видеолари жойлаштирилган.
112 ва Мash Telegram каналлари ёзишича, Губденскийнинг машинаси тўқнашиб кетган Mercedes автомобили Forbes рўйхатига киритилган тадбиркор Ратмир Тимашевга тегишли. Воқеа содир бўлган пайтда тадбиркор ўз машинасида бўлган-бўлмагани номаълум.
ЙТҲдан бир неча соат ўтиб, Кутузовский проспектида автомобилларнинг одатий ҳаракати тикланди.
Октябрь ойида россиялик телебошловчи Ксения Собчак ўтирган автомобиль ҳалокатга учраган эди. Қайд этилишича, Ксения Собчак йўловчи сифатида ўтирган Mercedes S500 ҳайдовчиси микроавтобусни қувиб ўтиш чоғида йўлнинг қарама-қарши йўналишдаги қисмига ўтиб кетган ва Volkswagen автомобили билан тўқнашган. Шундан кейин у отилиб кетиб, микроавтобусга тўқнашган. Оқибатда Volkswagen’нинг йўловчиси ҳалок бўлган, ҳайдовчи ва яна бир йўловчи шикастланган. Собчак жабрланмаган, ЙТҲдан кейин эса бошқа машинада жўнаб кетган.
Кейинроқ Ксения Собчакни олиб кетаётган автомобиль билан содир бўлган ЙТҲ видеоси эълон қилинди.
Изоҳ (0)