Александр Лукашенко Британиянинг BBC телерадиокорпорациясига берган интервьюсида Беларусь кучишлатар тузилмалари мигрантларга Польша чегарасини кесиб ўтишга ёрдам берганини «мутлақо мумкин» деб атади, деб хабар беради Meduza.
«Биз славянлармиз. Бизнинг юрагимиз бор. Қўшинларимиз мигрантлар Германияга кетаётганини билади. Уларга кимдир ёрдам берган бўлиши мумкин. Мен буни ҳатто текшириб ҳам кўрмайман», — дейди Лукашенко.
Шу билан бирга, Лукашенко Беларусь ҳукумати мигрантларни мамлакатга таклиф қилиб, уларнинг Европа Иттифоқига бориши учун осон йўл ваъда қилган ҳолда инқирозни юзага келтирганини рад этган.
«Мен уларга (Евроиттифоқ — таҳр.) мигрантларни чегарада ушлаб турмоқчи эмаслигимни айтдим. Агарда улар келишни давом этса, уларни тўхтатмайман, чунки улар менинг мамлакатимга эмас, сизларникига интилмоқда», — дейди Лукашенко.
«Биз уларни бу ерга таклиф қилмаганмиз. Тўғрисини айтганда, мен улар Беларусь орқали ўтишини хоҳламайман», — дея қўшимча қилади Лукашенко.
Беларусь президенти BBC’га 19 ноябрь куни интервью берган. Суҳбатнинг тўлиқ версияси ҳозирча эълон қилинмаган.
Александр Лукашенко ушбу ҳафтада Германия канцлери вазифасини бажарувчи Ангела Меркель билан икки марта телефон орқали Беларусь ва Европа Иттифоқи чегарасидаги миграция инқирозини, шунингдек, мигрантларга гуманитар ёрдам кўрсатиш масаласини муҳокама қилган. Меркель билан суҳбатдан сўнг Лукашенко мигрантларни чегара яқинидаги логистика марказига жойлаштириш бўйича кўрсатма берган.
Маълумотларга кўра, ҳозирда Беларусда Яқин Шарқдан келган 7 мингга яқин мигрант бор. Беларусь уларнинг 2 минг нафарини Германияга, 5 мингини эса ватанларига (улар рози бўлса) қайтариб юбориш таклифини берган. Меркель ушбу таклифни рад этган.
Изоҳ (0)