Грузия собиқ президенти Михаил Саакашвили Гори шаҳридаги ҳарбий госпиталга кўчирилди. Муассаса ҳудудига иккита ренимобиль ва полиция автомобиллари кирган, деб хабар беради «Коммерсантъ».
Бунга қадар Саакашвили Глданск қамоқхонасидаги шифохонада эди. Уни кўчириш бўйича қарорни Грузия Адлия вазирлиги қабул қилган. Собиқ президент госпиталга ўтказилишига рози бўлган. Унинг адвокати Ника Гварамиянинг маълум қилишича, Михаил Саакашвили бир ойдан ортиқ вақтдан бери давом этаётган очликни тўхтатишга рози.
Аввалроқ адлия вазири Рати Брегадзе даволаниш курси тугаганидан кейин Саакашвили Рустави қамоқхонасига ўтказилишини маълум қилганди.
19 ноябрь куни 49 кундан бери очлик сақлаб келаётган Саакашвили адвокати билан учрашув вақтида йиқилиб тушиб, ҳушидан кетгани ҳақида хабар берилганди. Йиқилгач, у кўзини очмаган ва ҳеч нарсани сезмаган. Саакашвилини «носилка»да олиб кетишган. У қамоқхона шифохонасининг жонлантириш бўлимига ётқизилган.
Саакашвилининг шахсий шифокори Николоз Кипшидзе Грузия собиқ президентининг аҳволи кескин ёмонлашганини маълум қилган. Шифокорнинг сўзларига кўра, организмдаги эндокринологик ва метаболик ўзгаришлар натижасида юзага келган тери сарғайиши аввалги кунларга нисбатан кучайган. Доктор Кипшидзе яқин кунларда бу ўзгаришлар тузатиб бўлмас ҳолга келишидан хавотирда эди.
Изоҳ (0)