Мисрнинг Ўрта Ер денгизи соҳилларига қум бўрони, жала ва бўрон ёпирилди. Табиий офат туфайли мамлакатнинг бир қатор вилоятларида мактаблар ёпилган, дея хабар берди Ahram online нашри.
Хабарларга кўра, бўронли шамоллар билан бирга ёғаётган ёмғир сув тошқинига сабаб бўлган, натижада автомобиллар ва озиқ-овқат дўконлари сув остида қолган. Искандария ва бошқа бир қатор шаҳарларда айрим кўчаларни сув босган, бу эса автомобиллар ҳаракатини қийинлаштирмоқда.
Бундан ташқари, Қоҳирадан 90 километр жануби-ғарбдаги воҳада жойлашган Файюм шаҳрида қум бўрони кузатилган. Гувоҳлар табиий ҳодисани видеога олди.
Қоҳира, шунингдек, кучли ёмғирдан ҳам жабр кўрди, аммо аксарият ҳудудларда коммунал хизматлар ёғингарчилик билан муваффақиятли курашди. Қоҳира ва Гизада расмийлар якшанба кунги мактаб дарсларини бекор қилди. Университетларда машғулотларни якка тартибда ўтказиш масаласи бўйича қарор қабул қилинади.
Миср метеорологларнинг маълумотларига кўра, мамлакатда 20 ноябрдан бошлаб тўрт кунлик беқарор об-ҳаво тўлқини бўлиши, мўътадил ва кучли ёмғир ёғиши, кучли шамол эсиб, ҳаво ҳарорати 3-4 даражага тушиши кутилмоқда.
Эслатиб ўтамиз, 4 ноябрь куни Тошкентда чанг миқдори рухсат этилган меъёрдан 5 баробарга, кейинроқ 30 баробаргача кўтарилганди ва пойтахт ҳавонинг ифлосланиш даражаси бўйича дунёда биринчи ўринга чиқди. 8 ноябрь куни Тошкент ҳавосидаги чанг миқдори нормал кўрсаткичга қайтди.
Изоҳ (0)