Qayiq bilan Yevropaga yo‘l olgan 75 dan ortiq muhojir O‘rta Yer dengizining Liviya sohillari yaqinida cho‘kib ketdi. Bu haqda Xalqaro migratsiya tashkilotining (XMT) Liviyadagi vakolatxonasiga tayanib, “RIA Novosti” xabar berdi.
XMT o‘zining Twitter’dagi sahifasida Yevropaga qayiqda yetib bormoqchi bo‘lgan 75 dan ortiq muhojir Liviya qirg‘oqlari yaqinida cho‘kib ketganini yozgan. Tashkilot ma’lumotlariga ko‘ra, yana 15 kishi baliqchilar tomonidan qutqarilib, quruqlikka olib kelingan.
Tashkilot xabarida ta’kidlanishicha, 2021-yil O‘rta Yer dengizida 1300 dan ortiq qochqin halok bo‘lgan.
Sentabr boshida Liviyaning g‘arbiy sohillari yaqinida 91 nafar noqonuniy muhojir qutqarib olingandi. Qayd etilishicha, Efiopiya va Eritreya aholisidan iborat muhojirlar guruhi rezina qayiqda, juda kam oziq-ovqat bilan ikki kun dengizda suzgan. Qutqarib olingach ular Tripoliga olib ketilgan.
Ma’lumot uchun 2011-yilda Liviya rahbari Muammar Kaddafi ag‘darilib, qatl etilganidan so‘ng, Liviya o‘zining yagona boshqaruvga ega davlat sifatidagi faoliyatini to‘xtatdi. Shu bilan birga, mamlakat Yevropaga o‘tmoqchi bo‘lgan noqonuniy muhojirlar uchun tranzit punktiga aylandi.
Izoh (0)