Туркманистон президенти Гурбангули Бердимуҳамедов 25 октябрь куни Қозоғистон президенти Қосим-Жўмарт Тўқаевни Туркманистоннинг «Битараплйк» («Бетарафлик») ордени билан мукофотлаш тўғрисидаги фармонни имзолади. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
Фото: «Хроника Туркменистана»
Тўқаевга орден «мустақил Туркманистоннинг доимий бетарафлигини тан олиш, Туркманистон ва Қозоғистон ўртасидаги дўстона муносабатларни мустаҳкамлашдаги алоҳида хизматлари учун, шунингдек, икки мамлакат ўртасидаги сиёсий, иқтисодий, илмий, таълим ва маданий соҳалар бўйича узоқ муддатли ҳамкорликни ривожлантиришга қўшган катта шахсий ҳиссаси учун» берилди.
24—25 октябрь кунлари Қозоғистон президентининг Туркманистонга давлат ташрифи бўлиб ўтди. Биринчи куни Тўқаев Бердимуҳамедов билан биргаликда Ахалтеке от спорти мажмуасига ташриф буюрди, у ерда Қозоғистон раҳбарига ахалтеке оти ва туркман овчи ити совға қилинди.
Иккинчи кун Бердимуҳамедов тор доирадаги музокаралар чоғида Қозоғистон—Туркманистон стратегик шериклигига оид кенг кўламли масалаларни муҳокама қилди, деб хабар беради Оқўрда, аниқ тафсилотларни келтирмасдан.
Тўқаевнинг матбуот хизмати кенгайтирилган таркибдаги икки томонлама музокаралар якунлари бўйича батафсил маълумот берди. Унга кўра, асосий янгилик Қозоғистон буғдойини Туркманистонга етказиб бериш ҳажмини ошириш бўйича келишув бўлди.
ОАВ учун ўтказилган қўшма брифингда Қосим-Жўмарт Тўқаев Қозоғистон металлургия, машинасозлик, нефть-кимё, озиқ-овқат ва фармацевтика саноати маҳсулотлари, шунингдек, қишлоқ хўжалиги маҳсулотлари, биринчи навбатда, ун ва буғдой етказиб бериш ҳажмини оширишга тайёр эканини яна бир бор таъкидлади. Қозоғистон, шунингдек, туркман гази импортини сезиларли даражада оширишга тайёр, дейилади хабарда.
Бундан ташқари, Қозоғистон раҳбари транспорт ҳамкорлиги мавзусига алоҳида тўхталган.
«Хроника Туркменистана» хабарига кўра, ташриф чоғида Қозоғистон президенти 1881 йилги жангларга бағишланган тарихий мажмуага ташриф буюрди, Иккинчи жаҳон урушида ҳалок бўлганларни хотирлади ва 1948 йилдаги Ашхобод зилзиласи қурбонлари хотирасини ёдга олди, Туркманистон Мустақиллик монументи пойига гул қўйди. Фахрий меҳмонлар хиёбонига кўчат ўтқазди.
Сафари якунида Қосим-Жўмарт Тўқаев туркманистонлик ҳамкасбини келаси йили давлат ташрифи билан Қозоғистонга таклиф қилди.
Эслатиб ўтамиз, Ўзбекистон Президенти Шавкат Мирзиёевнинг таклифига биноан Туркманистон президенти Гурбангули Бердимуҳамедов 4 октябрь куни расмий ташриф билан Ўзбекистонга келганди.
