Колумбиядаги энг йирик наркокартел раҳбари ҳибсга олинганидан сўнг янги, ундан ҳам кучлироқ жиноий раҳбар пайдо бўлиши мумкин. Бундай эҳтимолни Россия Фанлар академияси қошидаги Лотин Америкаси институтининг Сиёсий тадқиқотлар маркази катта илмий ходими Дмитрий Елесеенко «Lenta.ru»га берган интервьюсида айтиб ўтди.
«Ҳозирги шароитда, яъни Мексикадаги энг йирик картеллар Синалоа ва Халиско ўртасидаги уруш мексикаликларнинг Колумбия картеллари устидан назоратини заифлаштирган пайтда, бундай етакчининг пайдо бўлиши эҳтимоли аввалгидан кўра кўпроқ», — деди Елесеенко. У 1993 йилда Пабло Эскобарнинг ўлими ҳақида маълум бўлгач, Мексика картелларининг таъсири минтақага тарқала бошлаганини эслатди.
Эксперт, шунингдек, 2000 йилларда Мексикада бир неча йирик наркобаронларнинг йўқ қилиниши Синалоа картелининг пайдо бўлишига олиб келганини таъкидлади, бу картел 2021 йилгача Лотин Америкасидаги энг йирик ва енгилмаси бўлган. «Ҳокимиятда бўшлиқ ҳосил бўлиши ва бошқарувнинг йўқолиши кўпинча жиноий баронларнинг кўпайиши учун қулай замин яратади», — дея қўшимча қилди эксперт.
24 октябрь куни Колумбия ҳарбийлари ва полициясининг Некокли муниципалитетида ўтказган йирик махсус операцияси чоғида «Кўрфаз клани» раҳбари, Отониэл лақабли Дайро Усуга қўлга олинганди. Уни ҳибсга олишда 500 нафар хавфсизлик ходими иштирок этган. Колумбия президенти Иван Дуке Маркес бу воқеани Пабло Эскобарнинг қулашига қиёслаган.
Апрель ойида Дубай полицияси франциялик наркобарон Муфида Бушибини ҳибсга олганди. «Арвоҳ» номи билан танилган Бушиби миллионлаб долларлик гиёҳванд моддаларни Европага ноқонуний тарзда олиб кирган. Шунингдек, Осиёда энг кўп қидирувга берилган наркобарон Чи Лоп январь ойида Нидерландияда қўлга олинган.
Изоҳ (0)