Хитой «Толибон» ҳаракати Афғонистонда фаолият юритаётган террорчилик ташкилотларидан узоқлашиб, уларга қарши курашда самарали чоралар кўришига умид қилмоқда. Бу ҳақда Хитой ташқи ишлар вазири Ван И «Толибон» томонидан Афғонистон муваққат Вазирлар Маҳкамаси раиси ўринбосари лавозимига тайинланган Абдулғани Бародар билан Қатар пойтахти Доҳадаги учрашув чоғида айтиб ўтди.
«‘Шарқий Туркистон ислом ҳаракати’ Бирлашган Миллатлар Ташкилоти Хавфсизлик кенгаши томонидан халқаро террорчи ташкилот сифатида тан олинган. Бу Хитойнинг давлат хавфсизлиги ва ҳудудий яхлитлигига чинакам таҳдид солади, шунингдек, Афғонистондаги барқарорлик ва узоқ муддатли тартибни хавф остига қўяди», — дея Ван Ининг сўзлари келтирилган Хитой ТИВ сайтида.
«Афғонистон толиблари ниҳоят ‘Шарқий Туркистон Ислом ҳаракати’ ва бошқа террорчилик ташкилотлари билан аниқ чегара тортади ва уларга қарши курашда самарали чоралар кўради, деб умид қиламиз ва ишонамиз», — қўшимча қилди Хитой ТИВ раҳбари.
Хитой Ташқи ишлар вазирлигининг 25 октябрь куни берган маълумотларига кўра, Хитой Халқ Республикаси Давлат кенгаши аъзоси ташқи ишлар вазири Ван И 25—26 октябрь кунлари Қатарда расмий ташриф билан бўлиб, «Толибон» ҳаракати вакиллари билан учрашади.
Маълумот учун: «Шарқий Туркистон ислом ҳаракати» уйғурларнинг ноқонуний қуролли гуруҳи бўлиб, улар Шарқий Туркистонда мустақил ислом давлатини яратиш ва бутун Хитой халқига Исломни қабул қилдиришни мақсад қилган. Гуруҳ БМТ, Европа Иттифоқи ва бир қатор давлатларда террорчилик ташкилоти дея тан олинган.
Изоҳ (0)