Turkmaniston prezidenti Gurbanguli Berdimuhamedov 25-oktabr kuni Qozog‘iston prezidenti Qosim-Jo‘mart To‘qayevni Turkmanistonning “Bitaraplyk” (“Betaraflik”) ordeni bilan mukofotlash to‘g‘risidagi farmonni imzoladi. Bu haqda Turkmaniston davlat axborot agentligiga tayanib, “Xronika Turkmenistana” xabar berdi.
To‘qayevga orden “mustaqil Turkmanistonning doimiy betarafligini tan olish, Turkmaniston va Qozog‘iston o‘rtasidagi do‘stona munosabatlarni mustahkamlashdagi alohida xizmatlari uchun, shuningdek, ikki mamlakat o‘rtasidagi siyosiy, iqtisodiy, ilmiy, ta’lim va madaniy sohalar bo‘yicha uzoq muddatli hamkorlikni rivojlantirishga qo‘shgan katta shaxsiy hissasi uchun” berildi.
24—25-oktabr kunlari Qozog‘iston prezidentining Turkmanistonga davlat tashrifi bo‘lib o‘tdi. Birinchi kuni To‘qayev Berdimuhamedov bilan birgalikda Axalteke ot sporti majmuasiga tashrif buyurdi, u yerda Qozog‘iston rahbariga axalteke oti va turkman ovchi iti sovg‘a qilindi.
Ikkinchi kun Berdimuhamedov tor doiradagi muzokaralar chog‘ida Qozog‘iston—Turkmaniston strategik sherikligiga oid keng ko‘lamli masalalarni muhokama qildi, deb xabar beradi Oqo‘rda, aniq tafsilotlarni keltirmasdan.
To‘qayevning matbuot xizmati kengaytirilgan tarkibdagi ikki tomonlama muzokaralar yakunlari bo‘yicha batafsil ma’lumot berdi. Unga ko‘ra, asosiy yangilik Qozog‘iston bug‘doyini Turkmanistonga yetkazib berish hajmini oshirish bo‘yicha kelishuv bo‘ldi.
OAV uchun o‘tkazilgan qo‘shma brifingda Qosim-Jo‘mart To‘qayev Qozog‘iston metallurgiya, mashinasozlik, neft-kimyo, oziq-ovqat va farmatsevtika sanoati mahsulotlari, shuningdek, qishloq xo‘jaligi mahsulotlari, birinchi navbatda, un va bug‘doy yetkazib berish hajmini oshirishga tayyor ekanini yana bir bor ta’kidladi. Qozog‘iston, shuningdek, turkman gazi importini sezilarli darajada oshirishga tayyor, deyiladi xabarda.
Bundan tashqari, Qozog‘iston rahbari transport hamkorligi mavzusiga alohida to‘xtalgan.
“Xronika Turkmenistana” xabariga ko‘ra, tashrif chog‘ida Qozog‘iston prezidenti 1881-yilgi janglarga bag‘ishlangan tarixiy majmuaga tashrif buyurdi, Ikkinchi jahon urushida halok bo‘lganlarni xotirladi va 1948-yildagi Ashxobod zilzilasi qurbonlari xotirasini yodga oldi, Turkmaniston Mustaqillik monumenti poyiga gul qo‘ydi. Faxriy mehmonlar xiyoboniga ko‘chat o‘tqazdi.
Safari yakunida Qosim-Jo‘mart To‘qayev turkmanistonlik hamkasbini kelasi yili davlat tashrifi bilan Qozog‘istonga taklif qildi.
Eslatib o‘tamiz, O‘zbekiston Prezidenti Shavkat Mirziyoyevning taklifiga binoan Turkmaniston prezidenti Gurbanguli Berdimuhamedov 4-oktabr kuni rasmiy tashrif bilan O‘zbekistonga kelgandi.
Izoh (0)