БМТ Хавфсизлик кенгаши 25 октябрга ўтар кечаси Суданда ҳарбийлар ҳукумат аъзоларини ҳибсга олгани билан боғлиқ вазият бўйича ёпиқ йиғилиш ўтказади. Бу ҳақда ташкилот баёнотига таяниб, «ТАСС» хабар берди.
«Судандаги вазият ва бошқа масалалар бўйича йиғилиш соат 16:00 да ёпиқ форматда ўтказилади», — дейилади хабарда. Муҳокама сўрови АҚШ, Буюк Британия, Франция, Ирландия, Норвегия ва Эстония томонидан юборилган.
Судандаги давлат тўнтариши сабаб армия генерали Абдул Фаттоҳ ал-Бурҳон мамлакатда фавқулодда ҳолат эълон қилиб, ижроия ҳокимияти — ҳукумат ва суверен кенгашни тарқатиб юборди. «Коммерсантъ»нинг ёзишича, Судан бўйича халқаро «учлик» (АҚШ, Буюк Британия, Норвегия) ҳарбийлар томонидан қўлга олинган бош вазир Абдулла Хамдок ва ҳукуматнинг бошқа аъзоларини озод қилишга чақирган. Томонлар мамлакатдаги мазкур давлат тўнтаришини қоралаб, унинг иштирокчиларининг ҳаракати 2019 йилги инқилоб ғояларига қарши эканини билдирган.
Судан ҳарбийлари 25 октябрга ўтар кечаси мамлакат муваққат ҳукуматининг бир қатор вазирларини, жумладан, муваққат бош вазир Абдулла Хамдокни ҳибсга олди.
Суданда ҳарбийлар ва фуқаролик кучлари ўртасидаги муносабатларда инқироз бир неча ҳафтадан бери давом этмоқда. Зиддиятларни мулоқот орқали ҳал қилишга уринишлар кутилган натижага олиб келмаган, қарама-қарши лагерлар ўз тарафдорларини кўчаларга олиб чиққан. Норозилик намойишлари оқибатида етти киши ҳалок бўлган ва юздан ортиқ одам жароҳат олгани айтилмоқда.
Судан армияси Хартумдаги давлат телерадиостанцияси биносини назоратга олган. Кўплаб ходимлар ҳибсга олинган. Пойтахтда мобил алоқа ва интернет блокланган.
Изоҳ (0)