Марк Цукерберг «Facebook архиви»ни компанияга туҳмат қилишга уриниш деб атади

Facebook асосчиси Марк Цукерберг компаниянинг ички ҳужжатларига асосланган Facebook Papers («Facebook архиви») ҳақида биринчи марта фикр билдирди. Америка ОАВларида эълон қилинаётган мазкур ҳужжатларга кўра, ижтимоий тармоқ сўз эркинлиги ва тенглик тамойилларини эътиборсиз қолдирган. Дастлаб компания ходимлари билан гаплашган Цукерберг ўз баёнотини Facebook саҳифасига жойлади.

«Мен йирик ташкилотларни синчиклаб текшириш керак деб ҳисоблайман, мен улар бўлмаган жамиятдан кўра улар бор жамиятда яшашни афзал кўраман. Яхши ниятда қилинган танқид бизнинг такомиллашишимизга ёрдам беради. Аммо менинг фикримча, биз кўриб турган ҳолат компаниямиз ҳақида нотўғри тасаввур бериш учун ошкор этилган ҳужжатларни танлаб қўллаш учун ўзаро келишиб қилинган уринишдир».

Цукербергнинг таъкидлашича, компания қарорлар қабул қилишда сўз эркинлиги ва зарарли контентни камайтириш, махфийликни шифрлаш ва ҳуқуқ-тартибот органларини қўллаб-қувватлаш сингари бир-бирига рақиб ижтимоий адолат тушунчалари ўртасида мувозанатни топиши керак.

«Мен буларга аниқлик киритиш учун бир неча бор муайян тартиб-қоидалар ўрнатишга чақирдим, чунки компаниялар бундай қарорларнинг кўпини мустақил равишда қабул қилмаслиги керак деб ўйлайман», — деди Цукерберг.

Октябрь ойида АҚШнинг 17 та оммавий ахборот воситалари Facebook’нинг ички ҳужжатларига асосланган хабарларни чоп этди. Компаниянинг собиқ ходими Френсис Хауген журналистларга топширган ҳужжатларга кўра, Facebook, хусусан, нафрат келтириб чиқарадиган постларни олиб ташламайди, дезинформацияга қарши курашда мавжуд воситалардан фойдаланмайди ва VIP фойдаланувчиларга контентни модерация қилиш қоидаларини кенгайтирмайди.