Саудия Арабистони валиаҳд шаҳзодаси Муҳаммад бин Салом мамлакат подшоҳи Абдуллоҳ ибн Абдулазиз ал-Саудни Россиядан олиб келиниши керак бўлган заҳарланган узук ёрдамида ўлдириш имконияти ҳақида гапирган. Бу ҳақда мамлакат разведкасининг юқори мартабали собиқ ходими Саад ал-Жабрий CBS телеканалига берган интервьюсида маълум қилди, деб ёзади Meduza.
Унинг сўзларига кўра, 2014 йилда Муҳаммад бин Салом ўзининг амакиваччаси, ўша вақтда Саудия разведкаси раҳбари бўлган Муҳаммад бин Наифга тахтни отасига бўшатиб бериш учун подшоҳ Абдуллоҳни ўлдирмоқчи экани ҳақида айтган.
«У ‘мен подшоҳ Абдуллоҳни ўлдирмоқчиман’, деди. Мен Россиядан заҳарли узукни оламан. Қўлини сиқсам кифоя ва ундан қутуламиз… Балки у шунчаки мақтангандир, бироқ биз (Саудия разведкасидагилар — таҳр.) буни жиддий қабул қилдик», — дейди у.
Саад ал-Жабрий ўз сўзларига бирор далил келтира олмаган. Шу билан бирга, у Муҳаммад бин Салмон ва Муҳаммад бин Наифнинг суҳбати видеосини кўрганини маълум қилган. Унинг сўзларига кўра, видеоёзувнинг оригинали ҳамон сақланади, ундан икки нусха ҳам олинган. У ушбу видеолар қаерда сақланишини билишини ҳам айтган.
Саудия Арабистонининг Вашингтондаги элчихонаси ал-Жабрийни ўзининг «миллиардлаб долларлик молиявий жиноятлари»дан эътиборни чалғитмоқчи бўлган «обрўсиз давлат амалдори» деб атаган.
Саудия Арабистони подшоҳи Абдуллоҳ ибн Абдулазиз ал-Сауд 2015 йили 90 ёшида вафот этган. Тахтни унинг ўгай укаси Салмон ибн Абдулазиз ал-Сауд эгаллаган.
2017 йилда янги подшоҳ валиаҳдни алмаштирган — жияни Муҳаммад бин Наиф ўрнини ўғли Муҳаммад бин Салмон эгаллаган. Бин Ниаф ҳам, шунингдек, ички ишлар вазири лавозимидан истеъфога чиқарилган. 2020 йилда у ҳибсга олинган эди.
Саад ал-Жабрий бин Наиф қўл остида ишлаган. Саудия ҳукуматидаги лавозимидан айрилгач, ал-Жабрий Канададан бошпана олган. Унинг сўзларига кўра, ватанида саккиз нафар фарзандидан иккитаси ва куёви ҳибсга олинган.
Изоҳ (0)