Хитой Халқ Республикаси (ХХР) ҳукумати Хитой Халқ озодлик армиясини (ХХОА) шундай такомиллаштириши керакки, токи у мамлакат миллий манфаатларини, шунингдек, суверенитети ва хавфсизлигини ҳимоялашга қодир бўлсин. Бу ҳақда ХХР раҳбари Си Цзиньпин Хитой Коммунистик партиясининг 100 йиллиги муносабати билан сўзлаган нутқида айтиб ўтди.
«ХХОА мамлакат суверенитети, хавфсизлиги ва тараққиёт манфаатларини ишончли ҳимоя қилиши учун янада юқори имкониятларга эга бўлган жаҳон стандартларига мос қуролли кучга айланиши керак», — деди ХХР раҳбари.
Си Цзиньпин «кучли мамлакат кучли армияга эга бўлиши зарур» дея қўшимча қилди. Унинг фикрига кўра, фақат кучли армиягина мамлакат хавфсизлигини таъминлашга қодир.
Аввалроқ НАТО ҳарбий қўмитаси раиси Стюарт Пич Хитой ҳарбий модернизациясининг «ҳайратда қолдирадиган» тезлиги ҳақида огоҳлантирганди.
«Хитой ўз кемаларини қанчалик тез қургани, қисқа муддатда ҳаво кучларини модернизация қилгани, кибернетика ва ахборот бошқарувининг бошқа шаклларига қанча маблағ киритгани ҳайратга солади», — деди Пич.
Пичнинг таъкидлашича, НАТОнинг барча аъзолари вазиятни таҳлил қилиб, иттифоқ учун Хитойнинг ҳарбий амбициялари нимани англатишини ҳал қилиши зарур.
Изоҳ (0)