Дунё миллионерларининг умумий бойлиги 2020 йилда қарийб 80 триллион долларга етди

Дунёдаги барча миллионерларнинг умумий бойлиги 2020 йилда 7,6 фоизга ўсиб, 79,6 триллион долларни ташкил қилган. Бу ҳақда Capgemini SA компаниясининг World Wealth Report йиллик ҳисоботига таяниб «Интерфакс» хабар берди.

Ҳисоботга кўра, 2020 йилда бадавлат одамлар сони (high-net-worth individual, HNWI) 6,3 фоизга ўсиб, 20,8 миллион кишига етди. Бойликнинг ўсишига ўтган йили қимматли қоғозлар бозоридаги сезиларли тикланиш туртки бўлди.

Осиё-Тинч океани минтақаси беш йил давомида иккала кўрсаткич бўйича етакчи бўлиб келаётганди, 2020 йилда эса Шимолий Америка яна биринчиликка чиқиб олди. Америкада HNWI’лар сони 10,7 фоизга ўсиб, 7 миллион кишига етди, уларнинг умумий капитали эса 11,9 фоизга ўсиб, 24,3 триллион долларни ташкил қилди. Ўз навбатида Осиё-Тинч океани минтақасидаги ўсиш 5,8 фоизни (6,9 миллионгача) ва 8,4 фоизни (24 триллион долларгача) ташкил этди.

Европада бадавлат кишилар сони 2,8 фоизга (5,4 миллионгача), Африкада 2,7 фоизга (0,2 миллионгача), Яқин Шарқда 6,8 фоизга (0,8 миллионгача) ўсди. Шу билан бирга, Лотин Америкасида уларнинг сони 4 фоизга камайди (0,6 миллионгача).

Европада HNWI’нинг бойлиги 4,5 фоизга (17,5 триллион долларгача), Африкада 3,8 фоизга (1,7 триллион долларгача), Яқин Шарқда 10,7 фоизга (3,2 триллион долларгача), Лотин Америкасида 0,5 фоизга (8,8 триллион долларгача) ўсди.

Дунё мамлакатлари орасида ўтган йили бой одамлар сони бўйича биринчи ўринни АҚШ (6,575 миллион, 11,3 фоиз ўсиш) эгаллаган бўлса, ундан кейин Япония (3,537 миллион, +6,2 фоиз), Германия (1,535 миллион, +6,9 фоиз) ва Хитой (1,461 миллион, +11 фоиз) турибди. Ҳисоботда айтилишича, ушбу давлатларда дунёдаги барча ҲНWлъларнинг 62,9 фоизи яшайди, бу 2019 йилда 61,6 фоизни ва 2012 йилда 58,4 фоизни ташкил этган.

Россияда 2020 йилда 218 нафар миллионер қайд этилган, бир йил аввал улар 215 нафар эди.

Айни пайтда Буюк Британияда миллионерлар сони 591 кишидан 573 нафарга, Кувайтда 207 кишидан 205 нафарга, Бразилияда 199 кишидан 186 нафарга тушди. Биринчи 25 таликка кирувчи давлатлар орасида тушиш фақат шу 3 давлатда кузатилди.

2021 йилнинг биринчи чорагида дунёдаги миллионерлар бойлигининг 30 фоизини акциялар, 24 фоизини нақд пул ва унга тенглаштирилган нарсалар, 18 фоизини асосий даромад фондлари , 15 фоизини кўчмас мулк, 14 фоизни муқобил воситалар ташкил қилган.

World Wealth Report ҳисоботида 71 мамлакат маълумотларидан фойдаланилган. Дунё ялпи миллий даромадининг 98 фоиздан ортиғи ва жаҳон фонд бозорлари капиталлашувининг 99 фоизи ушбу давлатларга тўғри келади.