Россияда кетма-кет учинчи кун COVID-ўлимлар сони антирекорд ўрнатди. Москвада коронавирусга қарши қайта эмлаш бошланди

Россиянинг коронавирусга қарши кураш бўйича тезкор штаби маълумотларига кўра, ўтган кун давомида мамлакатда 672 киши COVID-19 туфайли вафот этди. Мамлакатда пандемия бошидан буён кетма-кет учинчи кун COVID-19’дан кунлик ўлимлар сони антирекорд ўрнатмоқда.

Россияда коронавирус қурбонларининг умумий сони 135 886 кишига етди. Ўтган суткадан 1 июль тонггига қадар мамлакатда коронавирусга чалиниш бўйича 23 543 та янги ҳолат аниқланди. Инфекция юқтирганларнинг умумий сони 5 538 142 кишига етди.

Касалланиш статистикаси бўйича минтақада Москва (кунига +7597 ҳолат), Москва вилояти (+2663) ва Санкт-Петербург (+1612) етакчилик қилмоқда.

Мамлакатда жами 5 017 321 киши касалликдан соғайиб кетди, шу жумладан, сўнгги 24 соат ичида 16 928 бемор касалхоналардан чиқарилди.

Москвада 1 июлдан коронавирусга қарши қайта эмлаш бошланди, дея маълум қилди шаҳар мэри Сергей Собянин.

Қайд этилишича, 5 июлга қадар фуқаролар «Здоровая Москва» (Москва Соғлиқни сақлаш департаменти)нинг 8 та павильонидан бирида коронавирусга қарши иккинчи марта эмланиши мумкин. 5 июлдан бошлаб эса шаҳар касалхоналарининг 12 тасида қайта эмланишга рўйхатдан ўтиш бошланади.

Қайта эмланиш биринчи эмланишдан ёки COVID-19 билан касаллангандан олти ой ўтгач тавсия этилади. «Бундан ташқари, бу антитаналарнинг мавжудлиги ва даражасидан қатъи назар амалга оширилиши керак», — дейилади хабарда.

Шаҳар мэрининг таъкидлашича, Россияда рўйхатдан ўтган ҳар қандай вакцина билан иккинчи марта эмланиш мумкин. Шу билан бирга у ҳозирда қайта эмлаш учун шаҳарда фақат «Спутник V» ва «Спутник Лайт» вакциналари мавжудлигини тан олди.

«Илтимос, вирусдан қўшимча ҳимояланиш имкониятини унутманг. Кўплаб одамларда касалликни янада оғирлаштираётган дельта штаммнинг тарқалиши шароитида бу жуда муҳимдир. Мен ўзим аллақачон иккинчи марта эмланганман», — деб ёзади Собянин.