Тошкентда такси ва қурилиш соҳасида коронавирус бўйича назорат кучайтирилади

Тошкент шаҳрида такси ва қурилиш соҳасида коронавирус бўйича назорат кучайтирилади. ССВ матбуот хизматининг хабар беришича, бу ҳақда Тошкент шаҳрида коронавирус инфекцияси янги штаммлари кенг тарқалишининг олдини олиш бўйича Тошкент шаҳар штабининг навбатдаги йиғилишида маълум қилинган.

Унда пойтахтда касаллик тарқалишининг олдини олишни кўзда тутувчи бир қатор назорат чоралари кўрилиши белгиланган.

Хусусан, барча қурилиш объектларида, ўша ернинг ўзида вақтинча яшаб ишлаётган қурувчи ва ишчиларни санитария-эпидемиология тартибларига қатъий риоя этиши юзасидан назорат кучайтирилади.

Шунингдек, транспорт хизмати сифатини ошириш, ҳайдовчи ва йўловчилар соғлиғини ҳимоя қилишни таъминлаш мақсадида йўналишсиз таксилар уч тилдаги (ўзбек, рус, инглиз тилларидаги) «хавфсиз такси» махсус белгиси билан бепул таъминлаш амалиёти жорий қилинади.

Бунда такси ҳайдовчилари ниқобда бўлиши ва кийиниш маданиятига риоя қилиши лозим. Шунингдек, автомобилда антисептик воситалари бўлиши, автоулов салони тоза ва дезинфекцияланган бўлиши талаб этилади.

Авалроқ Тошкентда «карантин талабларига риоя қилиш» назоратга олиниб, йўловчиларнинг ниқоб тақиши мажбурий этиб белгиланиши ҳақида хабар берилган эди.

Эслатиб ўтамиз, 14 март куни Ўзбекистонда декабрдан бери биринчи марта бир кунда 100 дан ортиқ одамда коронавирус аниқланиб, шундан 93 таси Тошкент шаҳрида қайд этилганди. Пойтахтда коронавирусга чалиниш ҳолатлари асосан ўқувчилар, талабалар ва ташкилот ходимлари орасида кўпайган. Хусусан, Тошкентдаги 77 та мактабда ўқувчилар орасида коронавирус инфекцияси аниқланди, 117-сонли боғчада икки нафар тарбиячи ва болаларда коронавирус аниқлангани сабаб мазкур боғча вақтинча ёпилди.

Коронавирус кенг тарқалишининг олдини олиш мақсадида Тошкентдаги айрим мактабларда ўқиш босқичма-босқич масофавий шаклга ўтказилмоқда, бозор ва савдо марказларида карантин талаблари кучайтирилди.