Садир Жапаровнинг ташрифи мобайнида Ўзбекистон ва Қирғизистон электр энергияси бўйича қандай келишувларга эришгани маълум бўлди

Энергетика вазирининг биринчи ўринбосари Шерзод Хўжаев 15 март, душанба куни ОАВ вакилларига берган интервьюсида Қирғизистон президенти Садир Жапаровнинг 11—12 март кунлари Ўзбекистонга қилган ташрифи давомида икки мамлакат ўртасида имзоланган электр энергиясини етказиб бериш тўғрисидаги меморандумга оид саволларга жавоб қайтарди, дея хабар бермоқда «Дарё» мухбири Миролим Исажонов.

Хўжаевнинг айтишича, Ўзбекистон ва Қирғизистоннинг энергетика идоралари расмийлари соҳага оид қатор масалалар бўйича бир ой мобайнида иш олиб борган.

«Бундан 40—50 йил олдин энергия тизими айни ривожланаётган пайтда нима қилинган эди: Ўзбекистонда иссиқлик электр станциялари бир хил меъёрда ишларди, Қирғизистон ва Тожикистонда гидроэлектр станциялари бизга сув керак бўлган вақтда ишлаб, қўшимча яна электр энергияси ишлаб чиқарарди. Шундай режимда ишлаганмиз. Кейин минг афсуски, мамлакатлар ўртасидаги муносабатлар бузилган.

Қирғизистон ўз эҳтиёжини қоплаш учун гидроэлектр станциялари сувини қишда кўпроқ ишлаб чиқара бошлади. Ёзгача сув камайиб қолаверди. Бизнинг ёзда сувга эҳтиёжимиз бор, лекин уларнинг сув омборида сув йўқ. Аммо қўшни мамлакатнинг қишда электр энергиясига эҳтиёжи бор.

Биз ташриф давомида шунга келишдикки, ҳар йили учун белгиланган маълум бир миқдордаги электр энергиясининг ортиқча қисмини уларга берамиз, улар бунинг эвазига ёз пайтида уч ой электр энергиясини қайтариб беради. Электр энергияни қайтариб берди дегани, хоҳлайдими, хоҳламайдими гидроэлектр станциялари сув омборидан Норин дарёси ва Сирдарё учун қўшимча сув чиқади, дегани. Бу Фарғона водийси, Сирдарё ва Жиззах вилоятлари қишлоқ хўжалигига жуда катта таъсир кўрсатади. Бу энг осон ва энг тез ечими топилган йўналиш», — деди вазир ўринбосари.

Унинг таъкидлашича, томонлар 24 соат давомида электр энергиясини ўзаро етказиб бериш бўйича ҳам келишувга эришган.

«Электр энергияси истеъмоли қиш ойларида соат 17:00 дан 21:00 гача бирданига ортиб кетади. Ҳамма уйига келиб, чироғини ёқади, овқат пиширишни бошлайди, чой қўяди ва ҳоказо. Шу тўрт соат учун биз қайсидир иссиқлик электр станциямизнинг қўшимча электр энергия блогига газ ёқиб, ишга тушириб, тўрт соатдан сўнг яна ўчирамиз. Бу аслида жуда катта самарасиз меҳнат.

Бунинг осонроқ йўли бор. Яъни биз қўшниларимизга ушбу тўрт соат мобайнида электр энергияси ишлаб чиқаришни ўзларининг гидроэлектр станцияларида ишлаб чиқаришни сўраймиз ва тунда биз ушбу ҳажмни қайтариб берамиз. Шу тариқа сутка давомида электр энергияси алмашинувини амалга оширишга келишдик. Масалан, биз тунда Қирғизистонга максимал даражада электр энергияси бериб, кундузи қайтариб оламиз. Бир-биримизга елкадош бўламиз.

Бизнинг техник имкониятимиз сутка мобайнида 10 миллион кВт/соатгача электр энергияси олиш ва етказиб беришга эга. Аслида, бу жуда катта кўрсаткич», — деди Хўжаев.