Англиянинг “Манчестер Сити” клуби марказий ҳимоячиси Vitoр Рейс фаолиятини Испанияда давом эттиради. Инсайдер Фабрицио Романонинг хабарига кўра, 19 ёшли бразилиялик футболчи Ла Лиганинг “Жирона” клубига ижара асосида ўтмоқда.
Манбага кўра, томонлар аллақачон трансфер бўйича келишиб олган. Рейс яқин кунларда Испанияга йўл олади ва “Жирона” учун тиббий кўрикдан ўтади. Шундан сўнг, трансфер расман эълон қилинади.
Футболчининг “Манчестер Сити”ни тарк этишига асосий сабаб — унга етарлича ўйин амалиётининг берилмагани бўлди. Айни пайтда “шаҳарликлар” ҳимоя чизиғида рақобат кучли бўлгани сабабли, Рейснинг асосий таркибдан жой олиши қийин кечади. Шу боис, клуб уни тажриба тўплаши учун ижарага беришга қарор қилган.
- Vitoр Рейс 2025 йилнинг январь ойида Бразилиянинг “Палмейрас” клубидан “Манчестер Сити”га 37 миллион евро эвазига трансфер қилинганди.
- Унинг инглиз клуби билан шартномаси 2029 йил ёзигача амал қилади.
- Ҳимоячи Гвардиола жамоаси сафида атиги 4 та ўйинда майдонга тушган.
- Transfermarkt портали футболчининг қийматини 30 миллион еврога баҳоламоқда.
Изоҳ (0)