15 март куни АҚШнинг гидротехника иншоотлари хавфсиз фаолиятини назорат қилиш бўйича мутахассислар гуруҳи Ўзбекистонга келди, деб хабар беради «Дунё» агентлиги.
Гидротехника иншоотлари хавфсиз фаолиятини мониторинг қилиш АҚШ армияси ҳарбий муҳандислар корпуси (United States Аrmy Cоrps оf Engineers, USACE) билан эришилган келишув доирасида ўтказилмоқда. Кўп йиллик амалий тажрибага эга бўлган америкалик мутахассислар 15—28 март кунлари Ўзбекистон Сув хўжалиги вазирлиги, «Ўзбекгидроэнерго» АЖ, «Давсувхўжаликназорат» давлат инспекцияси ва бошқа тузилмалар вакиллари билан биргаликда Қашқадарё ва Сурхондарё вилоятларида жойлашган «Ҳисорак» ва «Тўпаланг» сув омборларининг ҳолатини ўрганади.
Мутахассислар ушбу гидротехника иншоотларининг бугунги ҳолати ва яхлитлигини текшириб, уларнинг фаолиятида юзага келиши мумкин бўлган хавфларни таҳлил қилади. Ушбу жараёнда объектларнинг техник ҳужжатларини ўрганиш билан бир қаторда тўғонларни замонавий ускуналар билан бевосита текшириш ҳам режалаштирилган.
Тадқиқот натижалари асосида эҳтимолий носозликлар моделларини ишлаб чиқиш, уларнинг юзага келиши мумкин бўлган оқибатларини таҳлил қилиш, шунингдек, тўғонларнинг техник мониторингини ўтказиш ва хавфсизлик даражасини ошириш бўйича тавсиялар ишлаб чиқилади.
«Ўтган йил май ойида Сирдарё вилоятидаги «Сардоба» сув омборида содир бўлган техноген офат профилактика чоралари ва мутахассисларнинг касб маҳоратини ошириш муҳимлигини намойиш этди.
Ўзбекистонда сув ресурсларини бошқариш ва ирригация секторини ривожлантириш стратегиясига мувофиқ, 2021 йилда мамлакатимизда Йирик тўғонлар бўйича халқаро комиссия техник регламентлари ва тавсияларини қўллаш ва тасдиқлаш, шунингдек, хорижий давлатларнинг сув омборлари хавфсизлиги ва ишончли фаолиятини таъминлаш бўйича замонавий тадбирларни жорий этиш бўйича илғор тажрибасини ўрганиш бўйича таклифлар тайёрланади», — дейилади хабарда.
USACE — АҚШда 1775 йил ташкил этилган илк давлат хизматларидан бири. Айни пайтда 30 мингдан зиёд киши меҳнат қилаётган федерал агентлик, асосан, режалаштириш, лойиҳалаш, сув омборлари қуриш ва тошқинлардан муҳофаза қилиш ҳамда табиий экотизимларнинг биологик хилма-хиллигини тиклаш билан шуғулланади. Корпус АҚШда 3 мингдан ортиқ гидротехник иншоотларни эксплуатация қилиш ва уларга техник хизмат кўрсатишни таъминлайди, 110 мамлакатда гидротехника иншоотларини лойиҳалаш, қуриш, хавфсизлик бўйича тадқиқотлар ўтказиш ва тўғонларнинг бузилиши оқибатларини бартараф этишга ёрдам беради.
Эслатиб ўтамиз, июль охирида Шавкат Мирзиёев «Ўзбекистон Республикаси аҳолиси ва ҳудудининг сейсмик хавфсизлигини таъминлаш тизимини тубдан такомиллаштириш чора-тадбирлари тўғрисида»ги қарорни имзолаган эди. Қарор билан сейсмология, иншоотларнинг сейсмик мустаҳкамлигини ва сейсмик хавфсизликни таъминлаш соҳасидаги масъул давлат органлари белгиланган.
Мавзуга доир: «Техноген офат сабабларини ўрганиш учун россиялик мутахассислар жалб қилинган». Қурилиш вазири Сардоба сув омбори ҳақида
Изоҳ (0)