Мамлакат етакчилари ҳибсга олингач ҳокимиятни қўлга олган Мьянма Қуролли кучлари фавқулодда ҳолат бекор қилингандан сўнг янги сайловлар ўтказиш режасини эълон қилди. Бу ҳақда ҳарбийларнинг телевизион мурожаатига асосланиб «РБК» хабар берди.
Фото: «ТАСС»
Ҳарбийлар, шунингдек, ўтган йилги сайлов натижаларини қайта текшириш учун сайлов комиссиясини ислоҳ қилишга ва янги сайловлардан сўнг ҳокимиятни сайланган партияга топширишга ваъда берди.
Эслатиб ўтамиз, 1 февраль куни Мьянма ҳарбийлари мамлакатда ҳокимиятни қўлга киритганини эълон қилди, ҳукмрон партия раҳбарлари ва мамлакат президенти ҳибсга олинди. Қуролли кучлар бош қўмондони Мин Аунг Хлайну мамлакатнинг муваққат президенти этиб тайинланди ва мамлакатда бир йил муддатга фавқулодда ҳолат жорий этилди.
Давлат тўнтаришига сабаб қилиб ўтган йилги сайловлардаги сохталиклар ва сайлов комиссиясининг ҳаракатсизлиги кўрсатилди. 2020 йил ноябрда бўлиб ўтган сайловларда «Демократия учун миллий лига» партияси ҳукумат тузиш учун етарлича овоз тўплаган, ҳарбийлар томонидан қўллаб-қувватланган партия эса мағлуб бўлган.
БМТ бош котиби Антониу Гутерриш қуролли кучларнинг ҳаракатларини «Мьянмада амалга оширилган демократик ислоҳотларга жиддий зарар етказиш» дея қоралади. Шунингдек, АҚШ давлат котиби Энтони Блинкен Мьянма давлат раҳбарларининг ҳибсга олинишидан хавотир билдирди ва ҳарбийларни ҳибсга олинган сиёсатчиларни озод қилишга чақирди.
