Қозоғистонда аҳолини коронавирусга қарши эмлаш бошланди

Қозоғистонда 1 февралдан аҳолини коронавирусга қарши эмлаш бошланди. Tengrinews нашри ушбу эмлашга боғлиқ маълумотларни тақдим этди.

Мамлакат аҳолиси «Спутник V» вакцинаси билан эмланмоқда. Ҳозирда Россиянинг вакцинаси Қозоғистондаги Қарағанда фармацевтика мажмуаси томонидан ишлаб чиқарилмоқда.

Шу билан бирга, Қозоғистон томонидан ишлаб чиқилган QazCovid-in вакцинаси билан аҳоли оммавий равишда 2021 йил март ойидан бошлаб эмланди. Бу вакцина ҳозирда клиник синовлардан ўтказилмоқда.

Соғлиқни сақлаш вазири Алексей Сойнинг сўзларига кўра, эмлаш босқичма-босқич амалга оширилади.

Биринчи босқичда юқумли касалликлар шифохоналари, шошилинч тиббий ёрдам хизматлари, интенсив терапия бўлимлари, бирламчи тиббий-санитария ёрдами, шошилинч тиббий ёрдам, санитария-эпидемиология хизмати ходимларидан иборат юз мингга яқин одам 2021 йил 1 февралдан бошлаб ушбу вакцина билан эмланади.

Иккинчи босқичда 2021 йилнинг март ойидан 150 мингга яқин умумтаълим мактаб ҳамда университет ўқитувчилари ва тиббий хизмат ходимлари эмланади.

Учинчи босқичда мактаб-интернатлар, мактабгача таълим муассасалари ўқитувчилари, ўқувчилар, сурункали касалликларга чалинган одамлар апрель ойидан бошлаб вакцина қабул қилади. Кейин босқичма-босқич, 2021 йил охирига қадар олти миллионга яқин қозоғистонликни эмлаш режалаштирилган.

Соғлиқни сақлаш вазирлигининг маълумотларига кўра, эмлаш ихтиёрий равишда фақат эмланадиган кишининг розилиги билан амалга оширилади. Қозоғистоннинг «Одамлар саломатлиги ва соғлиқни сақлаш тизими тўғрисида»ги кодексининг 77-моддасига мувофиқ, қозоғистонликлар профилактика вакциналарини олишдан бош тортиш ҳуқуқига эга.

Шунингдек, мамлакатда электрон эмлаш паспортларини жорий этиш режалаштирилган. Электрон эмлаш паспорти – бу профилактик эмлашлар олинганлигини тасдиқловчи ҳужжат. Унда одам қандай дори-дармонларни қабул қилгани, қайси дозаларда, қайси саналарда бўлгани ва эмлашдан кейин қандайдир ножўя таъсири бўлгани тўғрисида маълумотлар мавжуд бўлади. Бирор киши коронавирусга қарши вакцинани қабул қилиши биланоқ бу ҳақда маълумот eGov мобил иловасида акс этади.

Соғлиқни сақлаш вазири Алексей Сой дастлаб эмлаш барча қозоғистонликлар учун бепул бўлмайди, деди. Шифокорлар, ўқитувчилар ва ҳуқуқни муҳофаза қилиш органлари ходимларидан ташқари, барча учун вакцина пуллик бўлиши таъкидланди.

Бироқ, кейинчалик мамлакат соғлиқни сақлаш вазирининг биринчи ўринбосари Марат Шоранов қозоғистонликлар бепул тиббий ёрдамнинг кафолатланган ҳажми доирасида эмланишлари мумкинлигини маълум қилди.

Жон Ҳопкинс университетининг маълумотларига кўра, Қозоғистонда 235 844 та коронавирус билан боғлиқ ҳолат аниқланган. Беморларнинг 3046 нафари вафот этган.

Аввалроқ Қирғизистон сақлаш шароитларини таъминлай олмаслиги сабабли Pfizer вакцинасидан воз кечгани, Қозоғистонликлар коронавирус туфайли киритилган чекловлар устидан яна судга мурожаат қилгани ҳамда мамлакат коронавирус тарқалиши бўйича «сариқ» зонага ўтгани ҳақида хабар берилганди.