Москванинг Шербинский туман суди сиёсатчи Алексей Навальнийнинг рафиқаси Юлия Навальнаяни 20 минг рубль миқдорида жаримага тортди. Бу ҳақда унинг адвокати Светлана Давидовага асосланиб «Интерфакс» хабар қилди.
Навальная рухсатсиз митингда қатнашиш моддаси бўйича айбдор деб топилди. У 31 январь куни тушдан кейин Москвадаги норозилик намойишида ҳибсга олинган, уч соатдан кўпроқ вақт давомида полиция бўлимида сақланган, кейин маъмурий баённома билан озод қилинган.
Meduza ва ОВД-Инфо маълумотларига кўра, 31 январь куни Россия шаҳарларида ўтказилган Алексей Навальнийни қўллаб-қувватлаш учун намойишларда 5400 дан ортиқ одам ҳибсга олинган. Бу Россия намойишларида ҳибсга олинганлар бўйича рекорд кўрсаткич ҳисобланади. Аввалги рекорд 23 январь куни ўрнатилганди, ўшанда полиция тўрт мингдан ортиқ одамни ҳибсга олган.
Айни пайтда Навальнийнинг ўзи Москвадаги 1-рақамли тергов изоляторида сақланмоқда. Суд сиёсатчини шартли судланган шахснинг хулқ-атвор қоидаларини бузган деб ҳисоблаб, уни Федерал жазони ижро этиш хизматининг талабига биноан 30 кунга ҳибсга олган ва 15 февралга қадар қамоқда бўлишини маълум қилган.
Аввалроқ Алексей Навальнийнинг укаси уй қамоғига юборилгани ҳақида хабар берилганди.
Изоҳ (0)