Қозоғистон Соғлиқни сақлаш вазирлиги Американинг Pfizer компанияси билан мамлакатга вакцина етказиб бериш тўғрисидаги меморандумни имзолади, деб хабар беради Tengrinews. Вакцина 2021 йилнинг иккинчи ярмида етказиб берилиши мумкин.
Қозоғистон соғлиқни сақлаш вазири ўринбосари ва давлат бош санитария шифокори Ерлан Киясовнинг сўзларига кўра, Pfizerни етказиб бериш бўйича дастлабки келишувлар аллақачон ўтказиб бўлинган.
«Pfizer Қозоғистонга йилнинг иккинчи ярмидан етказиб берилиши мумкин. Дастлабки келишувлар ўтказилган. Pfizer билан меморандум имзоланган. Батафсил масалалар муҳокама босқичида ҳал қилинади», — деди вазир ўринбосари.
Унинг сўзларига кўра, компаниянинг бошқа давлатлар олдидаги мажбуриятлари тўғрисидаги савол ҳали ҳам очиқ, чунки вакцина етишмовчилиги мавжуд.
Эслатиб ўтамиз, Қозоғистон бош санитария шифокори 1 февраль куни эрта тонгда Россиянинг «Спутник V» вакцинаси билан коронавирусга қарши эмланган. Худди шу куни қозоғистонликларни оммавий эмлаш бошланди.
2020 йил декабрь ойида Қозоғистонда кўнгиллиларни коронавирусга қарши маҳаллий QazCovid-in вакцинаси билан эмлаш бошлангани ҳақида хабар берилганди. Қозоғистон таълим ва фан вазири мамлакатда ишлаб чиқилган ушбу вакцинани ўзида синаб кўрганини маълум қилган.
Изоҳ (0)