АҚШнинг собиқ президенти Дональд Трамп Сенатда импичмент ҳақидаги иш бўйича жараёнда уни ҳимоя қиладиган ҳуқуқшунослар гуруҳига етакчилик қилиш учун иккита адвокатни ёллади. Бу ҳақда Трамп девонхонаси маълумотига таяниб, «РБК» хабар берди.
Судда собиқ президент манфаатларини адвокатлар Дэвид Шон ва Брюс Кастор ҳимоя қилади. Трамп девонининг таъкидлашича, адвокат Шон Трамп ва бошқа маслаҳатчилар билан бўлажак суд жараёнига тайёргарлик кўриш ишларини аллақачон бошлаб юборган.
«Шон ва Кастор ушбу импичментни конституцияга зид деган фикрни маъқулламоқда», — дейилади девонхона баёнотида.
Аввалроқ Reuters ва CNN телеканаллари Трамп жамоасини бир нечта адвокатлар, жумладан, импичмент иши бўйича унинг асосий ҳимоячиси бўлиши керак бўлган Батч Бауерс ва Дебора Барбери тарк этгани ҳақида хабар тарқатганди. Адвокатлар Жонни Гассер, Грег Харрис ва Жош Ховард ҳам собиқ давлат раҳбарининг жамоасини тарк этган.
Бунга Трампни ҳимоя қилиш стратегияси бўйича юзага келган келишмовчилик сабаб бўлган. Собиқ президент адвокатларнинг ўз далилларини ноябрда бўлиб ўтган сайловлардаги қалбакилаштириш ҳолатлари ҳақидаги баёнотларга асослашини талаб қилган. Ҳуқуқшунослар эса ҳимоя учун Трамп президент лавозимини тарк этганидан кейин импичмент ноқонунийлиги ҳақидаги фактни асос қилиб олмоқчи бўлган.
АҚШ Вакиллар палатаси 13 январь куни Трампга импичмент эълон қилди. Бунга январь ойининг бошида Вашингтонда ўтказилган тартибсизликлар сабаб бўлди. Собиқ давлат раҳбарининг тарафдорлари Капитолий биносига бостириб кириши оқибатида беш киши ҳалок бўлди. Демократлар Трамп фуқаролар орасида тартибсизлик ҳаракатларини қўзғатган деган фикрда.
Демократ сенатор Чак Шумернинг айтишича, импичмент бўйича тингловлар Конгресснинг юқори палатасида 8 февралдан кейин бошланади. АҚШ президенти Жо Байденнинг сўзларига кўра, Трампга импичмент эълон қилиш муваффақиятли якунланмайди, чунки Сенатда импичментни маъқуллайдиган овозлар етарли бўлмайди.
Дональд Трамп унга қарши бошланган импичмент жараёнини «энг катта жодугар овининг давоми» деб атаган ва президентлик сайловлари якунлари билан боғлиқ ҳолда бундан кейин ҳам зўравонлик қилишни истамаслигини айтган.
Изоҳ (0)