«Ҳудудгазтаъминот» компанияси Янги йил арафаси узунлиги 8 километр, диаметри эса 1020 миллиметрни ташкил этадиган газ қувурини қуришни бошлади, деб хабар беради компания матбуот хизмати.
Таъкидланишича, бу турдаги объектни қуриш ишлари сўнгги 40 йилдан буён биринчи маротаба амалга оширилаётган бўлиб, унинг фойдаланишга топширилиши Тошкент шаҳрида газ таъминотини яхшилашга хизмат қилади.
«Ҳудудгазтаъминот» маълумотларига кўра, бугунги кунда пойтахтда 671 мингдан ортиқ жисмоний ва 13 минг юридик шахс табиий газ истеъмолчиси ҳисобланади. 2020 йилнинг ўзида 4 миллиард метр кубдан ортиқ газ етказиб берилган — бу ўтган йилгига нисбатан 10 фоизга кўп.
«Зангори олов истеъмолининг ортиши биринчи навбатда пойтахт инфратузилмасининг ривожлангани, янги турар жой массивлари қурилгани, янги ишлаб чиқариш қувватлари яратилгани билан боғлиқ. Бу ўз навбатида мавжуд газ тақсимлаш тармоқлари инфратузилмасини кенгайтиришни талаб этади», — дейилади компания хабарида.
Сергели туманида қурилиш штаби тузилган. Майдончага 2506 метр қувур етказилган бўлиб, уларнинг 655 метри ҳозирда пайвандланган. Объектда 30 дан ортиқ мутахассис меҳнат қилмоқда ва 10 та махсус техника жалб этилган.
«Янги газ қувурини қуриш ишларини якунлаш 2021 йил январь ойларига режалаштирилган. Унинг фойдаланишга топширилиши Тошкентда газ ҳалқа артериясининг пайдо бўлишига имкон яратиб, пойтахт газ таъминотини яхшилайди, хусусан, Чилонзор, Учтепа, Яккасарой, Миробод ва Шайхонтоҳур туманларининг», — дейилади хабарда.
Эслатиб ўтамиз, 16 декабрь куни Президент Шавкат Мирзиёев бошчилигида ўтказилган видеоселектор йиғилишида давлат раҳбари электр энергияси, табиий газ ва кўмир таъминоти масалаларига ҳам тўхталиб ўтганди. Таъкидланишича, Ўзбекистонда бугунги кунда газ таъминотида суткасига 20 миллион метр куб танқислик мавжуд.
Изоҳ (0)