Тошкент вилояти бош инфекционисти Гулжаҳон Йўлдошеванинг судида навбатдаги гувоҳлар кўрсатмалари тингланди. Суд 4 январгача танаффус эълон қилди

28 декабрь куни Тошкент вилояти юқумли касалликлар шифохонаси бош шифокори Гулжаҳон Йўлдошева иши бўйича навбатдаги суд мажлиси бўлиб ўтди, деб хабар беради «Kun.uz».

Навбатдаги суд мажлисида ҳам иш бўйича жалб этилган гувоҳ ва мутахассисларнинг кўрсатмаси тингланган.

Гувоҳ Валия Жўраева карантин даврида Тошкент вилояти юқумли касалликлари шифохонасида ҳамшира бўлиб ишлаган. У судда марҳум Фаррух Рустамовнинг аҳволи ҳақида гапириб, касаллик тарихида унга COVID-19 ташхиси қўйилмаганини, унга ҳар гал кислород уланганда олиб ташлашини айтган.

Вилоят юқумли касалликлари шифохонасида қоровул бўлиб ишлаган гувоҳ Турдибек Айдинбаев Йўлдошеванинг ҳар куни ишга келганини, шифохонага текширув келганида уларга тўсқинлик қилмаганини билдирган.

«Гулжаҳон Йўлдошевага нисбатан эълон қилинган иқтисодий жиноятларга оид ҳолатлар бўйича Тошкент вилояти давлат молиявий назорати бошқармаси мутахассиси Музаффар Раҳимов кўрсатмалари тингланди. У шифохона фаолиятида бир нечта молиявий хатоликлар бўлганини қайд этди, бош шифокор изоҳ берди», — дейилади хабарда.

Шунингдек, судда Тошкент вилояти юқумли касалликлари шифохонаси бош шифокор ўринбосари лавозимида ишлаган Нилуфар Чўлиева ҳамда шу шифохонанинг ҳамшира-провизори бўлиб ишлаган Нафиса Тўраева, вилоят руҳий-асаб касалликлари шифохонаси ходимлари, ҳамшира ва назоратчиларининг ҳам кўрсатмалари тингланган.

Суд 2021 йилнинг 4 январигача танаффус эълон қилгани айтилмоқда.

Унинг қамоққа олиниши жамоатчилик ўртасида кенг муҳокамаларга сабаб бўлди. Бир қатор давлат ва нодавлат ташкилотларнинг раҳбарлари, хусусан, Сенат раиси Танзила Норбоева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева мазкур ҳодисага муносабат билдириб, прокуратурани шифокорга нисбатан қўлланилган эҳтиёт чорасини ўзгартиришга чақирган. Шундан сўнг Гулжаҳон Йўлдошева 6 октябрь куни уй қамоғига ўтказилганди.

Гулжаҳон Йўлдошева ва бошқаларга нисбатан суд жараёнлари 27 ноябрь куни бошланган.